ދިރާސީ އާ އަހަރުގެ ކިޔެވެން މިއަދު ފެށިފައިވާ އިރު، އަހުމަދިއްޔާ އިންޓަނޭޝަނަލް ސްކޫލްގެ ހުރިހާ ގުރޭޑަކަށް އެއް ދަންފަޅީގައި ކިޔަވައިދޭ ގޮތަށް ހަމަޖައްސައިފިއެވެ.

ޖާގައިގެ ދަތިކަން އޮންނަ މި ސްކޫލަކީ މާލެގެ ސުކޫލުތަކުގެ ތެރެއިން އެންމެ ބާރު ބޮޑު އެއް ސްކޫލެވެ. ގުރޭޑް 12 އާ ހަމައަށް 2000 އެއްހާ ކުދިން އަހުމަދިއްޔާ ސުކޫލުގައި ކިޔަވައެވެ. މީޑިއާއަކަށް މަައުލޫމާތު ދެމުން އެ ސްކޫލުން ބުނީ، މިހާތަނަށް އެ ސުކޫލުގައި ދެ ދަންފަޅިއަށް ކިޔަވައިދެމުންއައި ނަމަވެސް މިފެށުނު ދިރާސީ އައު އަހަރާއެކު ދެން ކިޔަވައިދޭނީ އެއް ދަންފަޅިއަށް ކަމަށެވެ. 

މިއަދުން ފެށިގެން ޕްރީ ސްކޫލުގެ ކުދިން ފިޔަވައި ދެން ތިބި ހުރިހާ ގްރޭޑެއްގެ ކުދިން ކިޔެވުން ފެށޭނީ 6:45 ގައެވެ. ގްރޭޑް 1 އިން 12 ގެ ދަރިވަރުންގެ ކިޔެވުން ނިމޭނީ މެންދުރު ފަހު 3 ގައެވެ.

ޖާގައިގެ ދަތިކަމަށް ހައްލެ ގެނައުމުގެ ގޮތުން މިހާރު ވަނީ ސުކޫލު ގޯތިތެރޭގައި އާ އިމާރާތެއް އަޅައިފައެވެ. ރަސްމީކޮށް މި އިމާރާތް ހުޅުވާނީ އަންނަ މަހު ކަމަށްވީ ނަމަަވެސް، ކުދިން މިއަދުން ފެށިގެން އެ އިމާރާތުގައި ހުރި އައު ކްލާސްރޫމްތަކުގައި ކިޔަވަން ފަށާނޭ ކަމަށް އެ ސުކޫލުން މައުލޫމާތުދީފައިވެއެވެ. 

އަހުމަދިއްޔާގެ މިހާރު ކިޔަވައިދޭ 258 ޓީޗަރުންނާއެކު އެއް ދަންފަޅިއަށް ކިޔެވުން ބަދަލުކުރުމަށް ކޮންމެހެން ބޭނުންވާ މިންވަރަށްވުރެ އެ ސްކޫލުގައި ޓީޗަރުންނާއި އެހެނިހެން ވަސީލަތްތައްވެސް ފުރިހަމަކުރެވި ދަރިވަރުންނަށް ފަސޭހަވާނެހެން އިންތިޒާމުތައް ގާއިމުކުރެވިފައިވާކަމަށް ސްކޫލުން ވަނީ ބުނެފައެވެ. 

އަހުމަދިއްޔާ ސްކޫލުގެ ޖާގައިގެ ދަތިކަމަށް ދާއިމީ ހައްލެއް ހޯދުމަށް 43،000 އަކަފޫޓުގެ ބިމެއް މީގެކުރިން ހުޅުމާލެއިން ވަނީ ހަމަޖައްސައިފައެވެ.