މާލޭ ވޯޓަރ އެންޑް ސުވަރޭޖް ކޮންޕެނީ، (އެމްޑަބްލިޔުއެސްސީ)ގެ އަމާޒަކީ ރަށްރަށުގައި ޑީސަލް ބޭނުން ނުކޮށް، އިޔާދަ ކުރަނިވި ހަކަތަ ބޭނުން ކޮށްގެން ފެން އުފެއްދުން ކަމަށް އެ ކުންފުނީގެ މެނޭޖިން ޑިރެކްޓަރ ޢަބްދުލް މަތީނު މުޙައްމަދު ވިދާޅުވެއްޖެއެވެ.

އެމްއެމްޓީވީގެ "ބޮޑު ޚަބަރު" ޕްރޮގްރާމުގައި ވާހަކަ ދައްކަވަމުން މަތީން ވިދާޅުވި ގޮތުގައި، ފެން އުފެއްދުމަށް އެންމެ ބޮޑު ހޭދައެއް ހިނގަނީ، ފެން ޕްލާންޓްތައް ހިންގުމަށް ޚަރަދުވާ ޑީސަލަށެވެ. އެ ކުންފުނީގެ އަމާޒަކީ ރަށްށުގައި ފެން އުފެއްދުމަށް، ސޯލާ އާއި ބެޓެރި ބެކަޕްގެ ގޮތުގައި ޑީސަލް ބޭނުންކުރާ ގޮތަށް ހައިބްރައިޑް ސިސްޓަމެއް ޤާއިމްކުރުން ކަމަށް އޭނާ ވިދާޅުވި އެވެ. 

"މި އަންނަ އަހަރު ތެރޭގައި މާލެ ފިޔަވާ އިތުރު ތިން ދިމާއެއްގައި، އެއީ ކުޅުދުއްފުއްޓާއި ދުވާފަރާއި މާފުށީގައި، އިޔާދަ ކުރަނިވި ހަކަތަ ގާއިމު ކޮށްގެން ފެން އުފެއްދުމުގެ ޚިދުމަތް ދޭން އަޅުގަނޑުމެން ފަށާނަން، އަމާޒަކީ ޑިސަލާ ނުލައި ފެން އުފެއްދޭ ވަރަށް އެތަން ތަނުގައި އިޔާދަކުރަނިވި ހަކަތަ ޤާއިމު ކުރުން،" މަތީނު ވިދާޅުވިއެވެ. 

މަތީނު ވިދާޅުވީ ކުޅުދުއްފުށީގައި ހައިބްރައިޑް ސިސްޓަމް ޤާއިމްކުުރުމުގެ އަމަލީ މަސައްކަތް ޖަޕާނު ކުންފުންޔަކާއި ގުޅިގެން އަންނަ އަހަރުގެ ކުރީކޮޅު ފަށާނެ ކަމަށެވެ. 

އޭނާ ވިދާޅުވީ ކާބަން މަދުކުރުމަކީ އެ ކުންދުނީގެ ވަރަށް ބޮޑު އަމާޒެއް ކަމަށާއި، މާލޭގައި ޖާގައިގެ ދަތިކަން ހުރުމުގެ ސަބަބުން، ހޯދަން ޖެހޭނީ އެހެން ހައްލެއް ކަމަށެވެ. 

ރާއްޖޭގައި އުފައްދާ ހަކަތައިގެ 33 ޕަސެންޓު، ފަސް އަހަރު ދުވަހުގެ ތެރޭގައި އިޔާދަ ކުރަނިވި ހަކަތައަށް ހެދުމަކީ ރައީސް ޑރ. މުޙައްމަދު މުޢިއްޒުގެ މެނެފެސްޓޯގައި ކަނޑަ އަޅާފައިވާ އަމާޒެކެވެ.