މާލެއާއި ހުޅުމާލޭ ގުޅުވައިދޭ ހަލިމަގު މަރާމާތުކުރުމުގެ މަސައްކަތް މިރެއިން ފެށިގެން ކުރިއަށްގެންދާތީ ސަމާލުވުމަށް ދިވެހި ފުލުހުންގެ ހިދުމަތުން އެދިއްޖެއެވެ. 

މިއަދު މީސްމީޑިޔާގެ އެކި މަންސަތަކުގައި ފުލުހުންގެ ހިދުމަތުން ކުރި ޕޯސްޓެއްގަައި ބުނެފައިވަނީ މާލޭ ސަރަހައްދުގެ މަގުތަކަކީ އަމާން މަގުތަކެއްކަމަށް ހެދުމަށް ކުރަމުންދާ މަސައްކަތްތަކުގެ ތެރެއިން ހުޅުމާލެ-މާލޭ ހަލިމަގުގައި ހުރި ޓްރެފިކް ލައިންތައް އާކުރުމުގެ މަސައްކަތް މިރޭ ފެށުމަށް ހަމަޖެހިފައިވާ ކަމަށެވެ. 

ފުލުހުންގެ ހިދުމަތުން ބުނެފައިވަނީ މިރޭ 12:00 އިން ފެށިގެން ހެނދުނު 6:00 އަށް ހަލިމަގުގެ ޓްރެފިކް ލައިންތައް އާކުރުމުގެ މަސައްކަތް ކުރިއަށްދާނެ ކަމަށެވެ. 

"ވީމާ، މި މަސައްކަތް ކުރިއަށް ދާއިރު، ހައިވޭ ބޭނުންކުރައްވާ ފަރާތްތަކުން މިކަމަށް ސަމާލުވުމަށް ދަންނަވަމެވެ،" ފުލުހުން ބުނެފައިވެއެވެ. 

ހަލިމަގު ބަލަހައްޓައި މަރާމާތުކުރުމުގެ މަސައްކަތް ހަވާލުކޮށްފައި އޮންނަނީ އެޗްޑީސީއާއެވެ. 

ހަލިމަގުގެ ދެފަރާތުގައި ޖަހާފައިވާ ދަގަނޑުތަކުގައި ދަނބަރުޖެހުމާއި، ތާރު މަގުގައި ކުރަހާފައިވާ މަގުމަތީގެ ނިޝާންތައްވެސް ވަރަަށް ފުވެހިފައިވާއިރު އެއާޕޯޓުގެ ފެންސުތައްވެސް ހުރީ މަރާމާތުކުރަންޖެހިފައެވެ. 

ފާއިތުވި ފަސް އަހަރު މިިފަދަ މުހިއްމު ބިނާރުތައް މަރާމާތުކުރުމުގެ އެކަށީގެންވާ މަސައްކަތެއް ކުރެވިފައިނުވެއެވެ. ރއީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިފަހުން ސަރުކާރުން އަންނަނީ އެފަދަ އެސެޓުތައް ބެލެހެއްޓުމުގެ މަސައްކަތް ހަރުދަނާކޮށް ކުރަމުންނެވެ.