ތައިލެންޑްގައި އޮތް ފުރަތަމަ ސާފް ފުޓްސަލް ޗެމްޕިއަންޝިޕްގައި ރާއްޖޭގެ ޤައުމީ ފިރިހެން ޓީމް ހޯދި ފަޚުރުވެރި ކާމިޔާބީ ފާހަގަކުރުމަށް މާދަމާ ރޭ ހަވާއެރުވުމާއެކު ހޫނު މަރުޙަބާއެެއް ކިޔުމަށް ޚާއްސަ ހަރަކާތްތަކެއް ބޭއްވުމަށް ނިންމައިފިއެވެ.

ކުޅިވަރާއި ހަށިހެޔޮކަމާއި ބެހޭ ވުޒާރާއިން ބުނި ގޮތުގައި އެއްވެސް މެޗަކުން ބަލިނުވެ ދިވެހި ޤައުމީ ފުޓްސަލް ޓީމް ހޯދި ކާމިޔާބީ ފާހަގަކުރުމުގެ ގޮތުން މާދަމާ ރޭ މާލޭގައި ގިނަ ހަރަކާތްތަކެއް ކުރިއަށް ގެންދަން ވަނީ ރާވާފަ އެވެ.

އެގޮތުން އާޓިފިޝަލް ބީޗަށް އެއްވެ ޢާންމުންގެ ފަރާތުން ޤައުމީ ޓީމަށް މަރުޙަބާ ކިޔުމާއެކު އުފާފާޅު ކުރުން އޮންނާނެ އެވެ. އަދި ހަވާ އަރުވާނެ އެވެ.

މި ހަރަކާތުގައި ވީހާވެސް ގިނަ ބަޔަކު ބައިވެރިވާން ވަނީ އެދިފަ އެވެ.

ފުރަތަމަ ސާފް ފުޓްސަލް ޗެމްޕިއަންޝިޕް ރާއްޖެއިން ކާމިޔާބު ކުރީ ހުރިހާ ޓީމުތައް ބަލިކުރުމަށް ފަހު އެއްވެސް މެޗަކުން ބަލިނުވެ ބާކީ އެއްމެޗު ކުރިއަށް އޮއްވަ އެވެ. އެއީ މިއަދު ސްރީލަންކާއާއެކު އޮތް މެޗެވެ. އެ މެޗް 2-5 ކާމިޔާބުކޮށް ރާއްޖޭން މުބާރާތް ނިންމާލީ ފަޚުރުވެރި ރެކޯޑަކާއެކު އެވެ.