ދެކުނު އޭޝިއާގެ ޤައުމުތަކަށް ބޭއްވި ފުރަތަމަ ސާފް ފުޓްސަލް ޗެމްޕިއަންޝިޕްގެ ފުރަތަމަ ޑިވިޝަނުގައި މިއަދު ކުޅުނު މެޗުގައި ސްރީ ލަންކާ އަތުން 5-2 އިން ހޯދީ މޮޅާއެކު، ލީގު ޗެމްޕިއަން ދިވެހިރާއްޖޭން ސައްތައިން ސައްތައިގެ ރެކޯޑަކާއެކު ނިންމާލައިފިއެވެ.

މި މުބާރާތުގެ ލީގު ޗެމްޕިއަންކަން ރާއްޖޭން ކަށަވަރުކުރީ ބާކީ އެއް މެޗު އޮއްވައެވެ. ރާއްޖޭން ވަނީ މުބާރާތުގައި ކުޅުނު ހަ މެޗުވެސް ކާމިޔާބުކޮށްފައެވެ. ފުރަތަމަ މެޗުގައި ޕާކިސްތާން އަތުން 7-1 އިން މޮޅުވިއިރު، ބަންގްލަދޭޝް އަތުން މޮޅުވީ 6-1 އިންނެވެ. އެއަށްފަހު، އިންޑިއާ 5-0 އިން ބަލިކުރިއިރު، ނޭޕާލް އަތުން މޮޅުވީ 2-1 އިންނެވެ. އެއަށްފަހު، ބޫޓާންގެ މައްޗަށް ކުރިހޯދީ 3-1 އިންނެވެ. ފަހު މެޗުގައި ލަންކާ އަތުން ވަނީ މޮޅުވެފައެވެ.

މި ނަތީޖާއާއެކު، ލީގުގެ އެއްވަނައިގައި ރާއްޖެ އުޅެނީ ހަ މެޗުން 18 ޕޮއިންޓް ހޯދައިގެންނެވެ. ދެވަނައިގައި އުޅޭ ނޭޕާލަށް ހަ މެޗުން ލިބިފައިވަނީ 11 ޕޮއިންޓެވެ. ތިންވަނައިގައި ޕާކިސްތާން އޮތީ ފަސް މެޗުން ހޯދީ 10 ޕޮއިންޓާއެކު އެވެ. ހަތަރުވަނައިގައި އިންޑިއާ އުޅެނީ ފަސް މެޗުން 8 ޕޮއިންޓް ހަމަކޮށްގެންނެވެ. 

ރާއްޖޭން މިއަދުގެ މެޗަށް ނިކުތްއިރު ސަސްޕެންޝަނުގެ ސަބަބުން ޢަބްދުﷲ ޝަފީޢު (ޝާއްޕެ) އަށް ނުކުޅެވުނުއިރު، އޭނާގެ ބަދަލުގައި ފުރުޞަތުދިނީ ޢަބްދުﷲ ޖުނައިދު (ޖޭންނެ) އެވެ. މީގެއިތުރުން، މުބާރާތުގައި ރާއްޖެ ކުޅުނު ހުރިހާ މެޗެއްގެ ފުރަތަމަ ފަހެއްގައި ހިމެނިގެން ކުޅުނު ކީޕަރު، ޒައިދާން އަހުމަދު (އަސޫ) ގެ ބަދަލުގައި މި މެޗުގައި ކުޅުނީ އިބްރާހިމް ނާޖިހު އެވެ.

ބެންކޮކްގެ ހުއަ މަކް އިންޑޯ ސްޓޭޑިއަމްގައި ކުޅުނު މެޗުގައި ރާއްޖޭން ލީޑުނެގީ 12 ވަނަ މިނެޓުގައި ކެޕްޓަން، މުޙައްމަދު އިމްރާން (އިންމި) އެވެ. މިއީ މުބާރާތުގައި މޮޅު ކުޅުމެއްދައްކަމުން އަންނަ އިންމި ކާމިޔާބުކުރި ނުވަވަނަ ގޯލެވެ.

މެޗުގެ 17 ވަނަ މިނެޓުގައި ރާއްޖޭން ހެދި ގޯހެއްގެ ފައިދާނަގައި، ލަންކާ އިން އެއްވަރުކުރީ މުޙައްމަދު ތިލްހަމް އެވެ. ފުރަތަމަ ހާފު ނިމެންދަނިކޮށް، އެންމެ ފަހު މިނެޓުގައި ރާއްޖޭން އަލުން ލީޑުނެގީ ހުޒައިފަތު ރަޝީދު (ހުޒޭ) ގެ ލަނޑުންނެވެ.

ދެވަނަ ހާފުގެ ކުޅުން ފަށައިގެން ހަވަނަ މިނެޓުގައި ލަންކާ އަށް ދެވަނަ ފަހަރަށް އެއްވަރުކޮށްދިނީ އަމާން މުޙައްމަދު ފައިޒާ އެވެ. ރާއްޖޭން އަލުން ލީޑުނެގީ 29 ވަނަ މިނެޓުގައި އާކިބް މުހައްމަދު އަތުން ބައިކޮޅަށް ވަތް ގޯލަކުންނެވެ. އޭގެ ފަސް މިނެޓުފަހުން، ހުސައިން ސުހައިލް (ސޮކޭ) ގެ ގޯލުން ވަނީ ނަތީޖާ 4-2 އަށް ބަދަލުކޮށްލާފައެވެ. އޭގެފަހުން، މެޗުގެ 36 ވަނަ މިނެޓުގައި ރާއްޖޭގެ ފަސްވަނަ ލަނޑުޖަހައިދިނީ ކެޕްޓަން، އިންމި އެވެ. މިއީ މުބާރާތުގައި އޭނާ ޖެހި ދިހަ ވަނަ ގޯލެވެ.

މުބާރާތުގައި ދެކުނު އޭޝިއާގެ ހަތް ގައުމަކުން ވާދަކުރިއެވެ. އެއީ، ރާއްޖޭގެ އިތުރުން ބަންގްލަދޭޝް، ބޫޓާން، އިންޑިއާ، ނޭޕާލް، ޕާކިސްތާން އަދި ސްރީ ލަންކާއެވެ.