މާލޭ ސިޓީގެ މައްސަލަތަކުގެ ވާހަކަ މިހާރުގެ މޭޔަރު އާދަމް އާޒިމްއާ ހަމައަށް ގެންދަވާ ކަމަށާއި، އެހެންނަމަވެސް ކަންކަން ހައްލުކުރުމުގައި އެއްބާރުލުން ނުލިބޭ ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުޙައްމަދު މުޞްޠަފާ އިބްރާހީމް ވިދާޅުވެއްޖެއެވެ.

"އެމްއެމް" ޓީވީގެ ބޮޑު ޚަބަރު ޕްރޮގްރާމްގައި ވާހަކަދައްކަވަމުން މެންބަރު މުސްޠަފާ ވިދާޅުވީ، ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި މާފަންނު ހުޅަނގު ދާއިރާގެ ރައްޔިތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރާއެކު ތިބެންނުޖެހޭ ސަބަބެއް ނެތް ކަމަށެވެ. އަދި، އެ ދާއިރާގެ ދޮރުންދޮރަށް ހަރަކާތްތައް ޖަނަވަރީ 27 ވަނަ ދުވަހު ފައްޓަވާނެކަމަށް މެންބަރު ވިދާޅުވިއެވެ.

ޕްރޮގްރާމްގައި ވާހަކަދައްކަވަމުން މެންބަރު އެންމެ ބޮޑަށް ޚުލާސާކޮށްދެއްވީ، މާލޭ ސިޓީގެ ކަންކަމުގައި އެމްޑީޕީއަށް ނިސްބަތްވެވަޑައިގަންނަވާ މޭޔަރު އާޒިމްއާ ހަމައަށް ގެންދެވި ކަންކަމަށް ކުރިއެރުމެއް ނުލިބުމުގެ ވާހަކަތަކެވެ.

މެންބަރު ފުރަތަމަ މިސާލެއްގެ ގޮތުން ނެންގެވީ މިހާރު ކުރިއަށްދާ ގޯލްޑަން ފުޓްސަލް ޗެލެންޖުގައި މާލެ ތަމްސީލުކުރާ ޓީމުތަކަށް މޭޔަރުގެ ފަރާތުން އެއްބާރުލުމެއް ނުލިބޭކަމެވެ. އެގޮތުން، މާފަންނު ފުޓްސަލް ޓީމު މިދިޔަ ދެ އަހަރު މުބާރާތަށް ނެރުނުއިރު ވެސް މޭޔަރާ ވާހަކަދެއްކެވި ކަމަށާއި، އެންމެ ކުޑަމިންވަރަކަށް ޓީމުގެ ފަރިތަކުރުންތައް ކުރިއަށްގެންދަން ސިޓީ ކައުންސިލްގެ ދަށުގައި އޮތް ފުޓްސަލް ދަނޑު ދިނުމަށް އެދުމުން އެކަން ނުކޮށްދެއްވި ކަމަށް މެންބަރު ވިދާޅުވިއެވެ.

އިތުރު ބޮޑު މައްސަލައެއްގެ ގޮތުން މެންބަރު ފާހަގަކުރެއްވީ މާފަންނުގައި ތަރައްޤީކޮށްފައި އޮތް ރަސްފަންނުގެ ޙާލަތު ދަށަށް ދިއުމެވެ. އާޒިމްގެ މޭޔަރުކަމުގައި މިދިޔަ ދެއަހަރު ރަސްފަންނު ފެނިގެންދިޔައީ "ފަނާވެގެންދިޔަ" ތަނެއްގެ ގޮތުގައި ކަމަށް މެންބަރު ވިދާޅުވިއެވެ.

މުސްޠަފާ ވިދާޅުވީ ރަސްފަންނަކީ މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހައުސިން މިނިސްޓަރުކަމުގައި ހުންނަވައިގެން ވެސް އަދި މޭޔަރުކަމުގައި ހުންނަވައިގެން ވެސް ވަރަށް ރަނގަޅަށް ބަލަހައްޓަމުން ގެންދެވި ތަނެއް ކަމަށެވެ.

މެންބަރު ވިދާޅުވީ، މިކަން ހައްލުކުރުމަށްޓަކައި އެބޭފުޅާ، މޭޔަރު އާޒިމްއާ ވާހަކަދައްކާވަފައިވާނެ ކަމަށެވެ. އެހެންނަމަވެސް، ހައްލެއް ނުލިބުމުން އަދުގެ ސަރުކާރުގެ ސަމާލުކަމަށް އެކަން އައިސް، ސަރުކާރުން ރަސްފަންނު މަރާމާތުކުރުމުގެ މަސައްކަތް ފެށިކަމަށް މެންބަރު ވިދާޅުވިއެވެ.

ރަސްފަންނުގެ އާބާތުރަ ފިލުވުމުގެ ގިނަ މަސައްކަތްތަކެއް ސަރުކާރުން މިދިޔަ އަހަރުތަކުގައި ކުރިއަށްގެންދެވި ކަމަށް މުސްޠަފާ ވިދާޅުވިއެވެ. އެންމެ ފުރިހަމައަށް ރަސްފަންނު މަރާމާތުގެ ކުރުމުގެ މަސައްކަތް ކުރިއަށް އޮތް ތަނުގައި ވެސް ސަރުކާރުން ކުރައްވާނެކަމަށް މެންބަރު ވިދާޅުވިއެވެ.

މުސްޠަފާ ވިދާޅުވީ މި ސަރުކާރުން ރައްޔިތުން ދޫނުކުރާނެ ކަމަށެވެ. ތަރައްޤީއަށް ކޮށްފައިހުރި ކަންކަން ދެމަހެއްޓުމަށްޓަކައި ސިޓީ ކައުންސިލަކީ މުހިއްމު އިދާރާއެއް ކަމަށާއި، އެހެންނަމަވެސް އެކަން ކުރެވޭނީ ކައުންސިލް ސަރުކާރާ ގުޅިގެން މަސައްކަތް ކުރާކަމުގައިވާނަމަ ކަމަށް މުސްޠަފާ ވިދާޅުވިއެވެ.