10 ކިލޯއަށް ވުރެ މަތީ، ކަންނެލި ގަންނަން ފެށިތާ ތިން ދުވަހުގެ ތެރޭގައި، ކިރުވި މަހަށް އެއްލައްކަ އަށް ވުރެ ގިނަ ރުފިޔާ މަސްވެރިންނަށް ދޫކޮށްފިއެވެ.

މިފްކޯއިން ބުނި ގޮތުގައި މިދިޔަ ހޮނިހިރު ދުވަހު ކިރުވި، ދިހަ ކިލޯއަށް ވުރެ މަތީގެ ކަންނެއްޔަށް އެކަނިވެސް 1،47،848ރ. މަސްވެރިންނަށް ދޫކޮށްފައިވެއެވެ. މިއީ 16 ދޯނިން ކިރުވި މަހެވެ. އަދި 15 ކިލޯއިން މަތީގެ ކަންނެއްޔަށް 43،630ރ. ދޫކޮށްފައި ވެއެވެ. މިއީ 10 ދޯނިން ކިރުވި މަހެވެ.

މީގެ އިތުރުން އެކުންފުނިން ވަނީ އެދުވަހު، 30 ދޯންޏަކުން ކިރުވި ކަޅުބިލަ މަހަށް ވާ، 1،170،125.62ރ ވެސް ދޫކޮށްފައެވެ. އެހެންކަމުން އެދުވަހު ކިރުވި މަހަށް ޖުމްލަ 1،361،613.62ރ. ވަނީ މަސްވެރިންނަށް ދޫކޮށްފައެވެ.

މިފްކޯއަށް 10 ކިލޯ އިން މަތީގެ ކަންނެލި ގަންނަން ފަށާފައިވަނީ މި މަހުގެ 20 ވަނަ ދުވަހުއެވެ. އެގޮތުން  ކޫއްޑޫ ބަނދަރާއި، އައްޑޫ ބަނދަރާއި އަދި ފުވައްމުލަކާއި ގދ. ގައްދޫއާއި ގދ. ތިނަދޫން މިފްކޯގެ ބޯޓުފަހަރަށް މި ސައިޒުގެ ކަންނެލި ގަނެފައިވެއެވެ.

ސަރުކާރުން މަސްވެރިން، ނިކަމެތިވިޔަ ނުދޭނެކަމަށް ދެއްވި ޔަގީންކަމުގެ ތެރެއިން ކުރަމުން ގެންދާ މަސައްކަތުގެ ތެރެއިން ދިހަ ކިލޯ އާއި 15 ކިލޯގެ އިތުުރުން، 15 ކިލޯއިން މަތީގެ ކަންނެލި 25ރ. ގެ މަގުން މިފްކޯއިން ވަނީ ސެންޓަރުތަކަށާއި ބޯޓުފަހަރަށް ގަންނަން ފަށާފައެވެ.

މަސްވެރިންނަށް ގަވާއިދުން ފައިސާ ނުލިބުމުގެ މައްސަލަ ހައްލުކުރީ ވެސް މި ސަރުކާރުންނެވެ. އެގޮތުން މަސްވެރިން ކިރުވާ މަހަށް ގަވާއިދުން ފައިސާދެމުން ގެންދާތާ މިހާރު ވަނީ އަހަރަކަށް ވުރެ ގިނަ ދުވަސް ވެފައެވެ. އަދި 48 ގަޑި އިރުގެ ތެރޭގައި މި ފައިސާ ވެސް މަސްވެރިންނަށް ދޫކުރަން ފެށިއެވެ.