ޓެކްސްގެ ގޮތުގައި ލިބުނު އާމްދަނީ ނުހިމަނާ ދައުލަތުގެ އާމްދަނީގެ ތެރެއަށް ޓޫރިޒަމުން 437 މިލިއަން ރުފިޔާ އިތުރުކުރެވުފައި ވާކަމަށް ފަތުރުވެރިކަމާ ބެހޭ ވަޒީރު އިބްރާހިމް ފައިޞަލް ވިދާޅުވެއްޖެ އެވެ.

އެމްއެމްޓީވީގެ "ބޮޑު ޚަބަރު" ޕްރިގަރާމުގައި ރޭ ވާހަކަ ދައްކަވަމުން ފައިޞަލް ވިދާޅުވީ ރިސޯޓް ތަރައްޤީ ކުރުމަށް ރަށްތައް ކުއްޔަށް ދޫކޮށްގެންނާއި ރިސޯޓްތަކުގެ ކުލީގެ މުއްދަތު އިތުރުކޮށްދީގެން މިދިޔަ ދެ އަހަރަށްވުރެ ބޮޑު  އާމްދަނީއެއް މިއަހަރު ލިބިފައިވާ ކަމަށެވެ.

"ވޭތިޔަދިޔަ ދެ އަހަރާއި އަޅަބަލާއިރު، ޓޫރިޒަމް ޓެކްސް އާ ނުލައި .... ރިސޯޓްތައް ޑިވެލޮޕްކުރަން ދޫކޮށްގެން 437 މިލިއަން ރުފިޔާ ވަނީ ދައުލަތަށް އާމްދަނީގެ ގޮތުގައި ހޯދިފައި، އާމްދަނީގެ ގޮތުން ބަލާއިރު ވެސް ވަރަށް ކާމިޔާބު އަހަރެއް، ދެހާސް ބާވީސް 2023 އެއްކޮށްލީމަ ވެސް ހޯދިފައި ވަނީ 210 މިލިއަނެއްހާ ރުފިޔާ،" ފައިސަލް ވިދާލުވި އެވެ.

ފަތުރުވެރިމަކާ ބެހޭ ވަޒީރު ވިދާޅުވި ގޮތުގައި ރާއްޖެ އަށް ޖައްސަޖައްސައިގެން ފަސް ވަނަ ފަހަރަށް ވޯލްޑް ލީޑިން ޑެސްޓިނޭޝަން އެވޯޑު ލިބުމަކީ މި އަހަރު ހޯދުނު އެންމެ ފަޚުރުވެރި ކާމިޔާބީ އެވެ. ވޯލްޑް ލީޑިން ގްރީން އެވޯޑް ފުރަތަމަ ފަހަރަށް ރާއްޖެ އަށް ލިބުމާއި އެއް  ދުވަހުގެ ތެރޭގަ އާއި އެއް މަސް ދުވަހުގެ ތެރޭގައި އެންމެ ގިނަ ފަތުރުވެރިން ގެނައުމަކީ ވެސް، މި އަހަރުގެ ތެރޭގައި ހޯދުނު ބޮޑު ކާމިޔާބީއެއް ކަމަށް ފައިސަލް ވިދާޅުވި އެވެ. މި އަހަރުގެ ފެބްރުއަރީ 11 ވަނަ ދުވަހު، 10،213 ޓޫރިސްޓުން ރާއްޖެ އައިސްފައިވެ އެވެ. އަދި އެ މަހު 217،392  ޓޫރިސްޓުން ރާއްޖެ އައިސްފައިވެ އެވެ.

ފައިސަލް ވިދާޅުވީ މި އަހަރަކީ އެއް މިލިއަން ޓޫރިސްޓުގެ އަމާޒު ވެސް އެންމެ އަވަހަށް ހާޞިލު ކުރެވުނު އަހަރު ކަމަށާއި، ދެ މިލިއަން ޓޫރިސްޓުންގެ އަމާޒު ވެސް މި މަހުގެ ފަހުކޮޅު ހާޞިލުވާނެ ކަމަށެވެ.

ރިސޯޓް ތަރައްޤީ ކުރުމަށް ދޫކުރި ރަށްތަކުގެ ތެރޭގައި ނުހެދި ގިނަ ދުވަސްވެފައިވާ ރަށްތަކުގެ އަދަދު 63 އިން 58 އަށް މިއަހަރު މަދުކުރެވުނު ކަމަށް ފައިޞަލް ވިދާޅުވި އެވެ. އެމަނިކުފާނު ވިދާޅުވީ، ނުހެދި ހުރި ރަށްތަކުން ވަރަށް ގިނަ އަދަދެއްގެ ފައިސާ ދައުލަތަށް ނުލިބި އެބަހުރި ކަމަށާއި، ހެދޭނެ ކަމުގެ ޔަގީންކަން ނެތް ފަރާތްތަކުގެ އަތުން ރަށްތައް ނެގުމަށް އިކޮނޮމިކް ކައުންސިލާ މަޝްވާރާ ކުރައްވާފައިވާ، އެޓާނީ ޖެނެރަލްގެ ލަފަޔަށް ފޮނުއްވާފައިވާ ކަމަށެވެ. 

"ޓޫރިޒަމް މިނިސްޓަރު ކަމާއި ހަވާލުވިއިރު އެންމެ ބޮޑަށް ފާހަގަ ކުރެވުނު އެއްކަމަކީ.... އެވޯޑު ކުރެވިފައި ވަރަށް ގިނަ ރަށް އެބަހުރި ނުހެދި، މިގޮތުން ބަލާލިއިރުގައި 63 ރަށެއް ވަނީ އައިޑެންޓިފައި ކުރެވިފައި، މިހާރު އަޅުގަނޑުމެނަށް ކުރެވުނު މަސައްކަތުން 58 ރަށަށް ވަނީ އެ އަދަދު މަދުކުރެވިފައި،"

ފައިސަލް ވިދާޅުވީ، ޓްރޭނިން ރިސޯޓެއް ތަރައްގީ ކުރުމަށްޓަކައި ލ. ހުޅިމެންދޫ ޤައުމީ ޔުނިވާސިޓީ އާ ހަވާލުކޮށްފައިވާ ކަމަށާއި، އެރަށް މަތީ ފެނަވަރުގެ ޓްރޭނިން ރިސޯޓެއްގެ ގޮތުގައި ތަރައްގީވެ ބޭރު ޤައުމުތަކުގެ ދަރިވަރުން ތައުލީމު ހާޞިލުކުރާތަން ދެކެވަޑައިގަންނަވަން ބޭނުންފުޅުވާ ކަމަށެވެ.