ބިޓްކޮއިންގެ އަގު ފުރަތަމަ ފަހަރަށް 100،000 ޑޮލަރަށް އަރައިފިއެވެ.

މިއީ އަލަށް އިންތިޚާބުވި ރައީސް ޑޮނަލްޑް ޓްރަމްޕް، ކްރިޕްޓޯ އާ ރައްޓެހި ސިޔާސަތުތަކެއް ގެންގުޅޭނެ ކަމަށް ބެލެވޭ އިސް މަޤާމުތަކަށް ޢައްޔަންކުރި ފަރާތްތައް އިޢުލާނުކުރުމާ ގުޅިގެން އައި ކުރިއެރުމެކެވެ.

ޢައްޔަންކުރެވުނު ފަރާތްތަކުގެ ތެރެއިން އެންމެ މުހިންމު އެއް ފަރާތަކީ ޕޯލް އެޓްކިންސްއެވެ. ޓްރަމްޕް ވަނީ އޭނާ ސެކިއުރިޓީސް އެންޑް އެކްސްޗޭންޖް ކޮމިޝަން (އެސްއީސީ) ގެ އިސްވެރިޔާގެ މަޤާމަށް ނޮމިނޭޓް ކުރުމަށް ނިންމާފައެވެ. އެސްއީސީ އަކީ ކްރިޕްޓޯ ކަރަންސީ ރެގިއުލޭޓްކުރާ މުއައްސަސާއެވެ.

އެޓްކިންސްއަކީ ކްރިޕްޓޯގެ ތާއީދުކުރާ ފަރާތެއް ގެ އިތުރުން ކުރީގެ އެސްއީސީ ކޮމިޝަނަރެވެ. 

ޓަރަމްޕް ރައީސްކަމަށް އިންތިހާބުވެ ވަޑައިގެންނެވުމާ ހިސާބަށް، ބިޓްކޮއިންގެ އަގު އެއް ދުވަހުގެ ތެރޭގައި 6،000 ޑޮލަރު އިތުރުވެ، 74،000 ޑޮލަރަށް ވުރެ މަތިވެފައިވެއެވެ. އޭގެ ހަފްތާއެއް ފަހުން އަގު 90،000 ޑޮލަރަށް އަރާފައިވެއެވެ.

މިހާތަނަށް މި އަހަރު ބިޓް ކޮއިންގެ އަގު ވަނީ 130 އިންސައްތަ އިތުރުވެފައެވެ. މީގެ ބޮޑު ބައެއް އައިސްފައިވަނީ އިންތިޚާބަށް ފަހު އައި ރެލީއާ ގުޅިގެންނެވެ. މިއީ އެސްއެންޑްޕީ 500 އިންޑެކްސްގެ 28 އިންސައްތައިގެ ކުރިއެރުމަށްވުރެ މާ މަތީ އަދަދެކެވެ.