ތަރައްޤީގެ މަޝްރޫޢުތައް ކުރިއަށްގެންދިއުމުގައި ރައްޔިތުންގެ ފަރާތުން ހޮވާ މަންދޫބުންގެ އެއްބާރުލުން ބޭނުންވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އޮފީސް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ، ރައްޔިތުންގެ ފަރާތުން ހޮވާ މަންދޫބުންނަކީ ރަށު ފެންވަރުގައި ދުވަހުން ދުވަހަށް މުނިސިޕަލް ޚިދުމަތް ދިނުމުގެ އިތުރުން، ސަރުކާރުން ހިންގާ މަޝްރޫޢުތަކާއި ވައުދުތައް ފުއްދުމުގައި އެއްބާރުލުން ދޭން ހޮވާފަ ތިބޭ، ނުވަތަ އެގޮތަށް މަސައްކަތްކުރަންޖެހޭ މަންދޫބުން ތަކެއްކަމަށެވެ.

މަންދޫބުންގެ އެއްބާރުލުން ބޭނުންވާކަން ފާހަގަކުރައްވައި ރައީސުލްޖުމްހޫރިއްޔާ ވަނީ، ކުރިއަށް އޮތް ލޯކަލް ކައުންސިލް އިންތިޚާބުގައި ކޮންގްރެސް ޕާޓީގެ ކެންޑިޑޭޓުން ހޮވައިދެއްވުމަށް އެދިވަޑައިގެންފައެވެ.

ރައީސުލްޖުމްހޫރިއްޔާ ވިދާޅުވީ، ވީ ހުރިހާ ވައުދެއް ފުއްދުމުގައި އަދި މިހާރު އެކި ކަންކޮޅުތަކުގައި އެކި ދާއިރާތަކުން ބާރު ސްޕީޑުގައި ކުރެވިގެންދާ ކަންކަމާއި، ފެށިގެންދާ ކަންކަމާއި، އަދި މިއަހަރަށް ކުރުމަށް ބަޖެޓުގައި ތަރުތީބުކުރެވިފައި ހުރި ކަންކަން ކުރުމުގައި ލޯކަލް ކައުންސިލަށް ހޮވޭ މެންބަރުންގެ އެއްބާރުލުން ބޭނުންވާނެ ކަމަށެވެ.

ރައީސުލްޖުމްހޫރިއްޔާ ވިދާޅުވީ، މިއަހަރަކީ އިޤްތިޞާދީ، އިޖުތިމާޢީ، އުމްރާނީ ގޮތުން ވެސް ތަރައްޤީގެ މަޝްރޫޢުތައް ހިންގުމުގައި މުހިއްމު އަހަރެއް ކަމަށެވެ. އެހެންކަމުން، އެކަންކަން ކުރުމުގައި ކޮންމެ ސިޓީއަކުން ވެސް ސަރުކާރަށް ފުރިހަމަ އެއްބާރުލުން ބޭނުންވާނެކަން ރައީސް ފާހަގަކުރެއްވިއެވެ.

ޤައުމު ހިންގުމުގައި އެންމެ އިސްކަމެއްދޭނީ މާތްވެގެންވާ އިސްލާމްދީނުގެ މަތީގައި ކަމަށާއި، ޤައުމިއްޔަތު ޙިމާޔަތްކުރެވި މިނިވަންކަން ކަށަވަރުކުރުމާއެކު ރާއްޖޭގެ ޚާރިޖީ ސިޔާސަތު ވެސް ފުރިހަމައަށް ބައްޓަންކުރެވިގެން ތަރުތީބުކުރެވިގެން ދާކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި، ޤައުމުގައި ހުރި އިޖުތިމާޢީ މައްސަލަތައް ހައްލުކުރުމުގައި ކުރިއެރުން ހޯދަމުންދާކަން ވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ހ. ވެޔޮވިލާގައި ޤާއިމުކޮށްފައިވާ ކޮންގްރެސްގެ އޮފީސް ހުޅުވުމުގެ ރަސްމިއްޔާތުގައި، ޕާޓީގެ އިސްވެރިންނާއި އެތައް ސަތޭކަ މެންބަރުންނެއް ވަނީ ބައިވެރިވެފައެވެ.