އޮތެންޓިކް މޯލްޑިވްސްގެ ސަޕްލަޔަރުންނަށް މިދިޔަ އެއް އަހަރު ދުވަހުގެ ތެރޭގައި ރެކޯޑް އަދަދަކަށް ފައިސާ ދޫކޮށްފައިވާ ކަމަށް ބިޒްނަސް ސެންޓަރ ކޯޕަރޭޝަން (ބީސީސީ) އިން ބުނެފި އެވެ.

އެ ކޯޕަރޭޝަނުން ބުނީ މިދިޔަ އެއް އަހަރު ދުވަހުގެ ތެރޭގައި ސަޕްލަޔަރުންނަށް 24.1 މިލިއަން ރުފިޔާ ދޫކޮށްފައިވާ ކަމަށެވެ. މިއީ ވޭތުވެދިޔަ ފަސް އަހަރު ދޫކުރެވުނު ޖުމްލަ ފައިސާއާ އަޅާ ބަލާއިރު 27 އިންސައްތަ އެވެ. އޮތެންޓިކް މޯލްޑިވްސް އިން މިހާތަނަށް ސަޕްލަޔަރުންނަށް 86.1 މިލިއަން ރުފިޔާ ދޫކޮށްފައިވެ އެވެ.

ދިވެހި އުފެއްދުންތެރިން އުފައްދާ ތަކެތި މާކެޓްކޮށް ވިއްކުމަށްޓަކައި ބިޒްނަސް ސެންޓަރ ކޯޕަރޭޝަނުން ހިންގާ އޮތެންޓިކް މޯލްޑިވްސް ފިހާރައިގެ ސަޕްލަޔަރުންގެ ގޮތުގައި330 އަށްވުރެ ގިނަ ވިޔަފާރި ހިމެނިފައިވާއިރު، 3،000 އަށް ވުރެ ގިނަ އުފެއްދުން މި ފިހާރަތަކުން ދަނީ ވިއްކަމުންނެވެ.

އޮތެންޓިކް މޯލްޑިވްސް މަރުކާގެ ދަށުން ބީސީސީން މިހާތަނަށް ހަ އައުޓްލެޓް ހުޅުވާފައިވާއިރު، މި ވޭތުވެދިޔަ އެއް އަހަރު ދުވަހުގެ ތެރޭގައި އާ ދެ އައުޓުލެޓް ވަނީ ހުޅުވާފަ އެވެ. އަދި މިދިޔަ އެއް އަހަރު ދުވަހުގެ ތެރޭގައި އަލަށް 38 ސަޕްލަޔަރަކު ވަނީ އޮތެންޓިކް މޯލްޑިވްސް އާ ގުޅިފައެވެ. ބީސީސީން މަޢުލޫމާތުދިން ގޮތުގައި އޮތެންޓިކް މޯލްޑިވްސްގެ ސަޕްލަޔަރުންގެ 60 އިންސައްތަ އަކީ އަންހެން ވިޔަފާރިވެރިންނެވެ.

ރާއްޖޭގެ ކުދި އަދި މެދުފަންތީގެ ވިޔަފާރިތައް ތަރައްޤީކޮށް ކުރިއެރުވުމަށްޓަކައި ސަރުކާރުން ޤާއިމްކޮށްފައިވާ، ބިޒްނަސް ސެންޓަރ ކޯޕަރޭޝަނުން ބުނީ، އެ ކޯޕަރޭޝަނުން މަސައްކަތް ކުރަމުން ދަނީ މިނިސްޓަރ އޮފް އިކޮނޮމިކް ޑިވްލޮޕްމަންޓް އެންޑް ޓްރޭޑުގެ ލަފާފުޅާއެކު، ރައީސުލްޖުމްހޫރިއްޔާ ޑޮކްޓަރ މުޙައްމަދު ވެވަޑައިގެންފައިވާ ވަޢުދުފުޅާ އެއްގޮތަށް، ތަފާތު މަސައްކަތްކުރާ ފަރާތްތައް، ޚާއްޞަކޮށް އާޓިސްޓުންނާއި އައިޓީ ދާއިރާ އަދި އަތްތެރި މަސައްކަތުގެ ދާއިރާ ހިމެނޭހެން ތަފާތު ހުނަރުތައް ބޭނުންކޮށްގެން އުފައްދާ އުފެއްދުންތައް ވިއްކޭނެ ގޮތް ބައިނަލްއަޤްވާމީ ޕްލެޓުފޯމްތަކުގައި ފަހިކޮށްދިނުމަށް ޚާއްޞަ މަސައްކަތްތަކެއް ވެސް ކުރަމުންދާ ކަމަށެވެ.

އެގޮތުން މިހާރުވެސް ޖަޕާނުގެ ކަންސާއީ އެއަރޕޯޓާއި ނަރީތާ އެއަރޕޯޓުގެ އިތުރުން ވޮޝިންޓަނުގައި ހުންނަ ވޯލްޑް ބޭންކުގެ ހެޑް ކުއާޓަރުގައި ދިވެހި އުފެއްދުންތައް އިސްތިހާރުކޮށް ވިއްކުމުގެ ފުރުޞަތު ވަނީ ފަހިކޮށްދީފައެވެ. އަދި ރާއްޖެއިން ބޭރުގައި ބޭއްވޭ އެކި ފެއަރތަކުގައި ދިވެހި އުފެއްދުންތައް ޑިސްޕްލޭ ކުރުމުގެ އިތުރުން، ބައެއް އެހެން ޤައުމުތަކުގައިވެސް ދިވެހި އުފެއްދުންތައް މާކެޓް ކުރެވޭނެ މަގު ފަހި ކުރުމަށް މަސައްކަތް ކުރަމުންދާކަމަށް ބީސީސީން ބުނެއެވެ.