އަމާޒަކީ ރޯދަމަސް ނިމޭހާތަނަށް ހާއްސަ ފަރުވާ ބޭނުންވާ މީހުންނަށް ހޯމް ނާސިންގެ ހިދުމަތް ފެށުންކަމަށް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ބުނެފި އެވެ. 

ހޯމް ނާސިން ކެއާގެ ޚިދުމަތް ފެށުމުގެ ގޮތުން ވަމުންދާ ތައްޔާރީތަކަށް ބޭނުންވާ ސައިކަލު ހޯދުމަށް މިހާރު އެ ހޮސްޕިޓަލުން ވަނީ އިއުލާނުކޮށް ފައެވެ.

"އެމްއެމްޓީވީ" އަށް މައުލޫމާތު ދެއްވަމުން އައިޖީއެމްއެޗްގެ މެޑިކަލް ޑައިރެކްޓަރ ޑރ. އާމިނަތު ޒޭބާ ވިދާޅުވީ ހޯމް ނާސިންގެ ޚިދުމަތަކީ އާއްމުކޮށް ހުޅުވާލެވިގެން ކުރިގެންދާ ޚިދުމަތެއް ނޫން ކަމަށެވެ. 

މި ޚިދުމަތަކީ އައިޖީއެމްއެޗްގައި އެޑްމިޓްކޮށްގެން ފަރުވާދިނުމަށްފަހު ދޫކޮށްލާ ބަލިމީހުންނާއި ދިގު މުއްދަތަކަށް ބޭސްފަރުވާ ކުރާ މީހުން ފަރުވާއަށް ފަހު ދޫކޮށްލުމުން އެ މީހުންގެ ހާލަތު ގާތުން ބެލުމަށް ކުރިއަށްގެންދަން ރާވާލެވިފައިވާ ޚިދުމަތެއް ކަމަށް ޑރ. ޒޭބާ ވިދާޅުވި އެވެ.

މި ޚިދުމަތް ފެށޭނެ ތާރީހަކާ ގުޅޭގޮތުން ސުވާލުކުރުމުން ޑރ. ޒޭބާ ވިދާޅުވީ މަސައްކަތްކުރަމުން ދަނީ ރޯދަމަސް ނިމޭހާތަނަށް ހޯމް ނާސިންގެ ހިދުމަތް ފެށުމަށް ކަމަށެވެ. 

މި ޚިދުމަތުގެ ސަބަބުން ބަލިމީހުން ހޮސްޕިޓަލަށް ގެންނަންޖެހޭ ޖެހުން މަދުކުރެވޭނެކަން ޒޭބާ ފާހަގަކުރެއްވި އެވެެ.