ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) މިހާރު ބައްޓަންކުރަމުން އަންނަ ގޮތުން، އަންހެން ފުޓްބޯޅަ ވެސް ޤައުމީ ލެވެލްއެއްގައި މުޅި ރާއްޖެއަށް ފުޅާކުރެވިގެންދާނެ ކަމަށް ރައީސުލްޖުމްހޫރިއްޔާގެ ނައިބު‎ އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ. 

އިއްޔެ ގަލޮޅު ދަނޑުގައި ކުޅުނު އެފްއޭއެމް ވިމެންސް ލީގު 2025 ގެ ފަހު މެޗު ޝަރަފްވެރިކޮށްދެއްވައި، މެޗަށްފަހު ދައުލަތުގެ މީޑިއާ ޕީއެސްއެމްއަށް ދެއްވި ބަސްދީގަތުމެއްގައި ރައީސުލްޖުމްހޫރިއްޔާގެ ނައިބު ވިދާޅުވީ، އަންހެން ފުޓްބޯޅަ މުބާރާތަކީ ފެށުމަކަށް ވާނެ ކަމަށެވެ. 

އެފްއޭއެމް މިހާރު ބައްޓަންވެފައި އޮތީ ރާއްޖޭގެ އެކި ޒޯންތަކުގައި މުބާރާތް ކުޅެގެން މާލެ އަންނަ ފޯމިއުލާއެއްގެ ގޮތުގައި ކަމަށް ރައީސުލްޖުމްހޫރިއްޔާގެ ނައިބު ވިދާޅުވިއެވެ. އެގޮތުން ފިރިހެން ފުޓްބޯޅަ ޒޯންތަކަށް ބަހާލައިގެން ކުޅެން ފަށާފައިވާއިރު، އަތޮޅުތެރޭގެ ޓީމުތަކަށް އަންނަ ސީޒަނުގެ ފުރަތަމަ ޑިވިޝަނުން ޖާގަ ލިބިގެންދާނެއެވެ. 

އެފްއޭއެމްއިން އެ ގެންނަ ބަދަލާއެކު، ރަށްތަކުގައި ވެސް އަންހެން ފުޓްބޯޅަ ޤައުމީ ލެވެލްގައި ކުޅެވިގެންދާނެ ކަމަށް ރައީސުލްޖުމްހޫރިއްޔާގެ ނައިބު ވިދާޅުވިއެވެ. 

އަންހެން ފުޓްބޯޅައިގައި މިދިޔަ އަހަރުތަކުގައި ރާއްޖެ އޮތީ ފަހަތުގައެވެ. ޤައުމީ ލީގެއް ނުބޭއްވުމާއި، ވާދަވެރި އެހެން އެއްވެސް މުބާރާތެއް ވެސް ޤައުމީ ފެންވަރުގައި މިދިޔަ އަހަރުތަކުގައި ކުޅެފައެއްނުވެއެވެ.

އެފްއޭއެމްގެ ހިންގުން ބޮއްސުންލާފައި އޮއްވައި މިހާރު ވަނީ މެނޭޖްމަންޓް ބަދަލުކޮށް އަލުން ހިންގަން ފަށައިފައެވެ. އަދި، ފުޓްބޯޅައިގެ ހަރަކާތްތައް މިހާރު ވަނީ ފޯރިއާއެކު ފަށައިފައެވެ. އެފްއޭއެމްގެ ބަދަލާއެކު އަންހެން ފުޓްބޯޅަ މުޅި ރާއްޖެއަށް ފުޅާކުރުމުގެ ވިސްނުމެއް ވެސް އެބައޮތް ކަމަށް މީގެކުރިން އެފްއޭއެމްއިން ވަނީ ބުނެފައެވެ. 

އެފްއޭއެމް ވިމެންސް ލީގު 2025 ގެ ފަހު މެޗުގައި އޮޑި ސްޕޯޓްސް ކްލަބް 0-2 އިން ބަލިކޮށް، ލީގު ޗެމްޕިއަންކަން ހޯދީ މާޒިޔާ ސްޕޯޓްސް އެންޑް ރެކްރިއޭޝަނުންނެވެ. 

މިފަހަރުގެ ވިމެންސް ލީގަކީ 2014 ވަނަ އަހަރުގެ ފަހުން ބޭއްވި ފުރަތަމަ ވިމެންސް ލީގެވެ. މިދިޔަ 11 އަހަރުތެރޭ ބޭއްވި ފުރަތަމަ ވިމެންސް ލީގު ފެނުނީ ފޯރިގަދަކޮށެވެ. ލީގު ޗެމްޕިއަންކަން ކަށަވަރުވީ ވެސް އިއްޔެ ކުޅުނު ފަހު މެޗުގައެވެ. 

މިއަހަރުގެ ވިމެންސް ލީގުގައި 6 ޓީމަކުން ވާދަކުރިއެވެ. އެއީ ޗެމްޕިއަން މާޒިޔާ އާއި ރަނަރަޕް އޮޑި ސްޕޯޓްސްގެ އިތުރުން، ތިން ވަނަ ހޯދި ވިކްޓްރީ ސްޕޯޓްސް ކްލަބާއި، ހަތަރު ވަނަ ލިބުނު ނިއު ރޭޑިއަންޓް ސްޕޯޓްސް ކްލަބުގެ އިތުރުން ފަސް ވަނަ ހޯދި ޓީސީ ސްޕޯޓްސް ކްލަބާއި ބިސް ބުރު ސްޕޯޓްސް ކްލަބެވެ.