ޑިސެންބަރު މަހުގެ މިހާތަނަށް މަސްވެރިންނަށް 60.4 މިލިއަން ރުފިޔާ ދޫކޮށްފައިވާކަން މޯލްޑިވްސް އިންޑަސްޓްރިއަލް ފިޝިންގ ކޮމްޕެނީ (މިފްކޯ) ގެ ތަފާސްހިސާބުތަކުން ދައްކައިފިއެވެ.

މިފްކޯ އިން އަންނަނީ ކޮންމެ ދުވަހަކު އެ ކުންފުނިން މަސްވެރިންނަށް ދޫކުރަމުންދާ ފައިސާގެ ތަފްސީލުތައް މީޑިޔާއާ ހިއްސާކުރަމުންނެވެ.

އެގޮތުން، އެ ކުންފުނިން މީޑިޔާއާ އެންމެ ފަހުން ހިއްސާކުރި ތަފާސްހިސާބުތަކަށް ބަލާއިރު، މި މަހުގެ އެއްވަނަ ދުވަހުން ފެށިގެން 23 ވަނަ ދުވަހުގެ ނިޔަލަށް 60،484،748.70ރ. (ފަސްދޮޅަސް މިލިއަން ހަތަރުލައްކަ އަށްޑިހަ ހަތަރުހާސް ހަތްސަތޭކަ ސާޅީސް އަށްރުފިޔާ، ހަތްދިހަ ލާރި) ވަނީ މަސް ދޯނިފަހަރަށް ދޫކޮށްފައެވެ.

މި މަހު މަސްވެރިންނަށް ފައިސާ ދޫކޮށްފައިވާ ގޮތުގެ ތަފުސީލު: 

1 ޑިސެންބަރު:  2.3 މިލިއަން ރުފިޔާ

2 ޑިސެންބަރު:  2.6 މިލިއަން ރުފިޔާ

3 ޑިސެންބަރު:  2.5 މިލިއަން ރުފިޔާ

4 ޑިސެންބަރު:  3.8 މިލިއަން ރުފިޔާ

5 ޑިސެންބަރު:  4 މިލިއަން ރުފިޔާ

6 ޑިސެންބަރު:  5.6 މިލިއަން ރުފިޔާ

8 ޑިސެންބަރު:  3.5 މިލިއަން ރުފިޔާ

9 ޑިސެންބަރު:  2.7 މިލިއަން ރުފިޔާ

11 ޑިސެންބަރު:  3.9 މިލިއަން ރުފިޔާ

12 ޑިސެންބަރު:  2.9 މިލިއަން ރުފިޔާ

13 ޑިސެންބަރު:  6 މިލިއަން ރުފިޔާ

15 ޑިސެންބަރު  4.2 މިލިއަން ރުފިޔާ

16 ޑިސެންބަރު:  4.3 މިލިއަން ރުފިޔާ

18 ޑިސެންބަރު:  2.6 މިލިއަން ރުފިޔާ

20 ޑިސެންބަރު:  4.2 މިލިއަން ރުފިޔާ

22 ޑިސެންބަރު:  2.4 މިލިއަން ރުފިޔާ

23 ޑިސެންބަރު:  1.7 މިލިއަން ރުފިޔާ

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު ކުރީ ސަރުކާރުން މަސްވެރިންނަށް ދޫނުކޮށް އޮތް 250 މިލިއަނެއްހާ ރުފިޔާ އޮތެވެ.  އެމަނިކުފާނުގެ ވެރިކަމުގެ ފުރަތަމަ އަހަރު މަސްވެރިންނަށް ދޫކުރަންޖެހޭ ފައިސާ ދޫކޮށް ނިންމަވައި، 2024 ވަނަ އަހަރުގެ މަސްވެރިންގެ ދުވަހު 48 ގަޑިއިރުތެރޭ މަސްވެރިންނަށް ފައިސާ ލިބޭނެ އިންތިޒާމު ރައީސް ހަމަޖެއްސެވިއެވެ. 

އެއަށްފަހު ކިރުވާ މަހަށް 48 ގަޑިއިރު ތެރޭ މަސްވެރިންނަށް ފައިސާ ދޫކުރަމުން އަންނައިރު މި ބަދަލާއެކު މަސްވެރިކަމަށް ބޮޑު ކުރިއެރުމެއް އައިސްފައިވެއެވެ. އެގޮތުން މަސްވެރިން ބާނާ މަސް ކިރުވާ މިންވަރާއި މަސް ބޭރުކުރާ މިންވަރު އިތުރުވެފައިވެއެވެ. 

މީގެއިތުރުން، ދާދިފަހުން ސަރުކާރުން ވަނީ މަސްވެރިންނަށް ވިއްކާ ތެލުގެ އަގު ވެސް ހެޔޮކޮށްދީފައެވެ. ސަރުކާރުގެ ސިޔާސަތުތަކާއި އެއްގޮތަށް މިފްކޯއިން މަސްވެރިންނަށް ވިއްކާ ތެލުގެ އަގަށް ގެނައި ބަދަލަކީ މަސްވެރިންނަށް ދޭ ހިދުމަތްތަކުގެ ފެންވަރު ރަނގަޅުކުރުމަށް އެޅުނު މުހިންމު ފިޔަވަޅެކެވެ.

މަސްވެރިން ކުރާ ބުރަ މަސައްކަތުގެ އަގުވަޒަންކުރުމަކީ ސަރުކާރުން ކޮންމެހެން ކުރަންޖެހޭ ކަމެއްކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.