މިދިޔަ އޮކްޓޯބަރު މަހު ކަރަންޓާއި އާންމުކޮށް ކެއުމަށް ބޭނުންކުރާ ގިނަ ބާވަތްތަކުގެ އަގުތައް ވަރަށް ބޮޑަށް ދަށްވެފައިވާ ކަމަށް ތަފާސްހިސާބުތަކުން ދައްކައިފިއެވެ.  

ސްޓެޓިސްޓިކް ބިއުރޯއިން އާންމުކުރި ތަފާސްހިސާބުތަކުން ދައްކާ ގޮތުގައި، މިދިޔަ އޮކްޓޯބަރު މަހު އެންމެ ބޮޑަށް އަގު ދަށްވެފައިވާ އަސާސީ ޚިދުމަތާއި މުދަލުގެ ތެރޭގައި ކަރަންޓު ހިމެނެއެވެ. މިގޮތުން، ކަރަންޓަށް 2.64 ޕަސެންޓުގެ ދަށްވުމެއް ރެކޯޑުކޮށްފައިވެއެވެ.

މީގެއިތުރުން މޭވާ އާއި ތަރުކާރީގެ އަގުތައް ވެސް ވަނީ އޮކްޓޯބަރު މަހު ދަށްވެފައެވެ. މިގޮތުން، އެ ދެ ބާވަތުން އެއް ޕަސެންޓާއި 3.91 ]ޕަސެންޓުގެ ދަށްވުމެއް އައިސްފައިވެއެވެ.

ކެއުމަށް ބޭނުންކުރާ ބާވަތްތަކުގެ ތެރެއިން އޮކްޓޯބަރު މަހު ދެން އެންމެ ބޮޑަށް އަގު ދަށްވެފައިވަނީ ފިޔާ، ލުނބޯ، ލޮނުމެދު، ގިތެޔޮ މިރުސް، ކެރެޓް ފަދަ އާންމުކޮށް ބޭނުންކުރާ ކާނާގެ ބާވަތްތަކުންނެވެ. 

ތަފާސްހިސާބުތަކުން އިތުރަށް ދައްކާ ގޮތުގައި، މިދިޔަ އޮކްޓޯބަރު މަހު އަގުތައް މައްޗަށް ގޮސްފައިވާ މަދު ބާވަތްތަކުގެ ތެރޭގައި ޓެލެ ކޮމިޔުނިކޭޝަނާއި މަހުގެ ބާވަތްތައް ހިމެނެއެވެ.