އަވައްޓެރި ސްރީ ލަންކާއަށް ދިމާވި މޫސުމީ ކާރިސާއާ ގުޅިގެން އެޤައުމަށް އެހީވުމުގެ ގޮތުން ޕީއެސްއެމްއިން އިސްނަގައިގެން އިއްޔެ ފެށި "ސިލޯނާއެކު ދިވެހީން" ޓެލެތޯން މިއަދު މެންދުރު ފަހު 2 ޖެހުމާ ހަމައަށް ކުރިއަށްގެންދަން ނިންމައިފިއެވެ. 

ލަންކާގެ ރައްޔިތުންނަށް އެހީވުމުގެ ގޮތުން ޓެލެތޯން ފެށީ އިއްޔެ ހެނދުނު 9 ޖެހިއިރުއެވެ. ޓެލެތޯން ކުރިއަށްގެންދަން އެންމެ ފުރަތަމަ ތާވަލު ކުރީ ރޭ މެންދަމު 1 ޖެހުމާ ހަމައަށެވެ. 

ޓެލެތޯންގެ ވަގުތު އިތުރުކުރުމާ ގުޅޭގޮތުން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ އަބްދުﷲ ޔާމީން ރަޝީދު ވިދާޅުވީ، ޓެލެތޯން ގެ ވަގުތު އިތުރުކޮށްފައިވަނީ ގިނަ ބަޔަކަށް ފައިސާގެ އެހީތެރިކަން ފޯރުކޮށްދިނުމަށް ފުރުޞަތު ދިނުމުގެ ގޮތުންކަމަށެވެ.

ޚާއްސަކޮށް ރޭ ބީއެމްއެލްގެ އެޕްލިކޭޝަން އަށް ކުރިމަތިވި ޓެކްނިކަލް މައްސަލައާ ގުޅިގެން ފައިސާ ޓްރާންސްފާ ކުރުމަށް ދަތިތަކެއް ކުރިމަތިވުމުން އިތުރު ފުރުޞަތެއް ދިނުމުގެ ގޮތުން ވަގުތު އިތުރުކުރީ ކަމަށް ޔާމީން ވިދާޅުވިއެވެ. 

ޓެލެތޯންގައި މިހާތަނަށް 37 މީޑިއާއަކުން ވަނީ ބައިވެރިވެފައެވެ. އަދި، އިތުރު މީޑިއާތަކަށް ވަނީ ފުރުޞަތު ހުޅުވާލާފައެވެ. 

ޓެލެތޯންގެ ދިވެހި ރުފިޔާ އެކައުންޓަށް މިހާތަނަށް 2.3 މިލިއަން ލިބިފައިވާކަމަށް ޕީއެސްއެމްއިން ވަނީ ބުނެފައެވެ. އަދި، އެމެރިކާ ޑޮލަރު އެކައުންޓަށް 38 ހާހަށް ވުރެ ގިނަ ޑޮލަރު ވަނީ ލިބިފައެވެ.