ބ. އޭދަފުށްޓަށް ގިނަގުނަ ޚިދުމަތްތަކެއް ކޮށްދެއްވާފައިވާ، އެރަށު ޑޭޒީވިލާ، މުޙައްމަދު ޢަލީ އަވަހާރަވުމުގެ ހިތާމައިގައި އެ ޢާއިލާއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުޒިޔާ ވިދާޅުވެއްޖެއެވެ. 

މުޙައްމަދު ޢަލީ އަވަހާރަވީ އިންޑިއާގެ ޗެންނާއީގައި ފަރުވާދެމުން ދަނިކޮށް އިއްޔެ އެވެ. އުމުރުފުޅުން 91 އަހަރުފުޅުގައި މުޙައްމަދު ޢަލީ އަވަހާވީއިރު، "މަސްޖިދުލް މުޙައްމަދު ޢަލީ" ގެ ނަމުގައި މުޙައްމަދު ޢަލީ ވަނީ އޭދަފުށީގައި މިސްކިތެއް ބިނާކުރައްވައި ހުޅުއްވައިދެއްވައިފައެވެ. 

ރައީސުލްޖުމްހޫރިއްޔާ ޢާއިލާއަށް ތަޢުޒިޔާ ދެންނެވީ މުޙައްމަދު ޢަލީ އަވަހާރަވުމުގެ ހިތާމައިގައި ރޭ "އެކްސް" ގައި ކުރެއްވި ޕޯސްޓެއްގައެވެ. 

ރައީސުލްޖުމްހޫރިއްޔާ ވިދާޅުވީ މުޙައްމަދު ޢަލީ އަކީ އޭދަފުށީގެ ތަރައްޤީއަށް، އެ ރަށުގައި ވިޔަފާރިއާއި ދަތުރުފަތުރާއި މަސްވެރިކަން ކުރިއެރުވުމަށް، އިޖްތިމާޢީ ކަންކަމަށް، ވަކީން ޚާއްޞަކޮށް މިސްކިތް ބިނާކުރެއްވުމާއި އިސްލާމް ދީނަށް ޚިދުމަތް ކުރެއްވުމަށް މުޅި ރާއްޖެއަށް ނަމޫނާ މަސައްކަތްތަކެއް ކޮށްދެއްވާފައިވާ ބޭފުޅެއް ކަމަށެވެ. 

އޭދަފުށީގައި މުޙައްމަދު ޢަލީ ބިނާކުރެއްވި މިސްކިތަކީ މިހާރު ރާއްޖޭގައި ހުރި އެންމެ ރީތި މިސްކިތެވެ. އެ މިސްކިތް ހުޅުވީ 2025 މާރިޗު 20 ވަނަ ދުވަހެވެ. 

މުޙައްމަދު ޢަލީ އެންމެ ބޮޑަށް ބޭނުންވި ކަމަކީ އޭނާ މި ދުނިޔެއިން ވަކިވުމުގެ ކުރިން އަމިއްލަ ރަށުގައި މިސްކިތެއް ބިނާކޮށްދެއްވުމެވެ. އޭދަފުށީގައި ބިނާކުރި ހިތްގައިމު އެ މިސްކިތުގެ ހުރިހާ މަސައްކަތެއް ނިންމީ މުޙައްމަދު ޢަލީގެ ބޭފުޅުންގެ އެހީތެރިކަމާއެކު ގާތްގަނޑަކަށް ހަތަރު އަހަރު ދުވަހުންނެވެ. 

މުޙައްމަދު ޢަލީ ދޫކޮށްލެއްވި މިސްކިތް ބިނާކުރުމުގައި އަސްލަކަށް ބަލާފައިވަނީ އޮމާން، އުޒްބެކިސްތާން، ދުބާއީ، ސަޢޫދީ އަރަބިއްޔާ އަދި ތުރުކީ ފަދަ ޤައުމުތަކުގައި ހުންނަ މިސްކިތްތަކަށެވެ. މިސްކިތުގެ ޗާލުކަން އިތުރުވީ އެ ސަރަޙައްދުގައި ހުންނަ މިސްކިތްތަކާ އެއްގޮތަށް މިސްކިތް ޑިޒައިންކުރުމުންނެވެ. 

މިހާރުވެސް އެ މިސްކިތުގެ މަޤްބޫލުކަން އެރަށުގައި ބޮޑެވެ. ޚާއްޞަކޮށް ރަށުން ބޭރުން އެރަށަށް ޒިޔާރަތްކުރާ މީހުންގެ މެދުގައި އެ މިސްކިތް ވަރަށް މަޤްބޫލެވެ.