ސްރީލަންކާއަށް ކުރިމަތިވެފައިވާ މޫސުމީ ކާރިސާގައި އެގައުމުގެ ރައްޔިތުންނަށް އެހީތެރިކަން ފޯރުކޮށްދިނުމަށް ޕީއެސްއެމްއިން އިސްނަގައިގެން ރާއްޖޭގެ މީޑިޔާތަކާ ގުޅިގެން ކުރިއަށްގެންދާ ޓެލެތޯންއަށް ކްރައުން އެންޑް ޗަމްޕާ ރިސޯޓްސްއިން 10،001 ޑޮލަރު ހަދިޔާކޮށްފިއެވެ. 

ރާއްޖޭގައި އެންމެ ފުޅާ ދާއިރާއެއްގަައި ރިސޯޓު ވިޔަފާރި ހިންގާ އެއް ކުންފުނި ކަމުގައިވާ ކްރައުން އެންޑް ޗަމްޕާ ރިސޯޓުތަކުގައި މަސައްކަތްކުރާ މުވައްޒަަފުންގެ 25 އިންސައްތަ މުވައްޒަފުންނަކީ ސްރީލަންކާއަށް ނިސްބަތްވާ މުވައްޒަފުންނެވެ. 

އެ ކުންފުނިން ބުނި ގޮތުގައި އެ ކުންފުނީގައި ލަންކާއަށް ނިސްބަތްވާ މިހާ ގިނަ އަދަދެއްގެ މުވައްޒަފުން މަސައްކަތްކުރުމާއެކު، އެ ކުންފުނިން ނިންމީ އެ މުވައްޒަފުންގެ ގައުމަށް މިހާ ހިތްދަތި އުދަގޫ ހާލަތެއް ކުރިމަތިވެފައިވާ ދަނޑިވަޅުގައި ވީހާވެސް ބޮޑަށް އެހީތެރިވުމަށެވެ. އެގޮތުން "ސިލޯނާއެކު ދިވެހީން" ޓެލެތޯނުގެ ތެރެއިން އެ ގައުމަށް 10،001 ޑޮލަރު ހަދިޔާކުރަން އެ ކުންފުނިން ނިންމާފައިވެއެވެ. 

ރާއްޖޭގައި އެކި ގައުމުތަކަށް އެހީތެރިވުމަށް ހިންގާ އެކި ހަރަކާތްތަކުގައި އަބަދުވެސް ކްރައުން އެންޑް ޗަމްޕާ ރިސޯޓްސްއިން އަަންނަނީ ދީލަތި އެހީތެރިކަން ފޯރުކޮށްދެމުންނެވެ. އެގޮތުން ފަލަސްތީނަށް އެހީވުމަށް ކުރިއަށްގެންދިޔަ ހަރަކާތްތަކުގައިވެސް އެ ކުންފުނިންވަނީ ދީލަތީ އެހީ ފޯރުކޮށްދީފައެވެ. 

މިއަދު ހެނދުނު ފެށި ޓެލެތޯނަށް ވަރަށް ބޮޑު ތަރުހީބެއް އަންނަނީ ލިބެމުންނެވެ. އެގޮތުން މިހާތަނަށް އަށްލައްކައަށްވުރެ ގިނަ ރުފިޔާ އަދި 11،000 އަށްވުރެ ގިނަ ޑޮލަރު ޓެލެތޯނަށް ލިބިފައިވެއެވެ. 

ޓެލެތޯނަށް ފައިސާ ހަދިޔާކުރުމަށް ހާއްސަ ރުފިޔާ އަދި ޑޮލަރު އެކައުންޓުން ބީއެމްއެލްއިން ހުޅުވާލާފައިވެއެވެ. އަދި އެ އެކައުންޓުތަކަށް ފައިސާ ޓްރާންސްފާ ކުރުމުގެ އިތުރަށް ކިއުއާރް ކޯޑު މެދުވެރިކޮށް ފައިސާ ފޮނުވޭނެ އިންތިޒާމު ހަމަޖައްސާފައިވެއެވެ. 

އޭގެ އިތުރަށް މާލޭގެ ބައެއް ސަރަަހައްދުތަކުގައި ޓެލެތޯނަށް ފައިސާ ހަދިޔާކުރުމަށް ހާއްސަކޮށް ފަންޑު ފޮށިތައް ބަހަައްޓާފައިވެއެވެ. އަދި ރަށްރަށުގައި ކައުންސިލުތަކާ ގުޅގެން ޓެލެތޯނަށް ފައިސާ ހޯދުމުގެ މަސައްކަތްވެސް އަންނަނީ ކުރަމުންނެވެ.