އދ. މަހިބަދޫގައި ފުޓްސަލް އާއި ފުޓްބޯޅައިގައި ރެފްރީން ތަމްރީން ކުރުމުގެ ކޯހެއް ކާމިޔާބުކަމާއެކު ނިންމާލައިފިއެވެ.

މިއީ މޯލްޑިވްސް ނޭޝަނަލް އިންސްޓިޓިއުޓް އޮފް ސްޕޯޓްސާއި ރާއްޖޭގެ ފުޓްބޯޅަ އެސޯސިއޭޝަން އަދި އދ އަތޮޅު ކައުންސިލް ގުޅިގެން 20 ނޮވެމްބަރުން ފެށިގެން 29 ނޮވެމްބަރަށް ކުރިޔަށްގެންދިޔަ ކޯހެކެވެ.

9 ދުވަހަށް ކުރިޔަށްގެންދިޔަ މި ކޯހުގައި 26 ފަރާތަކު ބައިވެރިވެފައިވެއެވެ. އެއީ އދ ގެ މަހިބަދޫ، މާމިގިލި، އޮމަދޫ، ކުނބުރުދޫ އަދި ހަންޔާމީދޫ އެވެ. އަދި ކ އަތޮޅުގެ ތުލުސްދޫ، ގުރައިދޫ އަދި ކާޝިދޫ އެވެ. މީގެ އިތުރުން ވ.ފެލިދޫ، އއ.ހިމަންދޫ، ގއ. މާމެންދޫ، ރ. ދުވާފަރު އަދި ފ. ދަރަނބޫދޫ ހިމެނެއެވެ.

މި ކޯސް އިސްނަންގަވާ ކުރިޔަށްގެންދެވީ އަހްމަދު އަމީޒް އަދި މުހައްމަދު ސައީދު އެވެ. މި ކޯހުގެ އެހީގައި ބައިވެރިންނަށް ފައިދާހުރި މައުލޫމާތުތަކެއް ލިބި، ރަނގަޅު ތަޖުރިބާއަކަށް ވާނެކަމަށް އިންސްޓްރަކްޓަރުން ބުނެފައިވެއެވެ.

މި ކުޅިވަރު އިތުރަށް ތަރައްޤީވެގެންދާނެކަން ފާހަގަކޮށް ކޯށް ފުރިހަމަކުރި ހުރިހާ ބައިވެރިންނަށް ތަހުނިޔާ އަދާކޮށްފައިވެއެވެ.