ސައިކްލޯން ޑިޓުވާގެ ސަބަބުން ސްްރީލަންކާއަށް ކުރިމަތިވެފައިވާ މޫސިމީ ކާރިސާއާ ގުޅިގެން އެގައުމަށް އެހީތރިކަން ފޯރުކޮށްދިނުމަށް ދައުލަތުގެ މީޑިޔާ ޕީއެސްއެމްއިން އިސްނަގައިގެން ރާއްޖޭގެ އެކި މީޑިޔާތަކާ ގުޅިގެން ކުރިއަށްގެންދާ ޓެލެތޯނުގައި މިހާތަނަށް އަށް ލައްކައަށްވުރެ ގިނަ ރުފިޔާ ލިބިއްޖެއެވެ. 

މިއަދު ހެނދުނު "ސިލޯނާއެކު ދިވެހިން"ގެ ނަމުގައި ފެށި ޓެލްތޯން ކުރިއަށްގެންދަން ހަމަޖެހިފައިވަނީ ހެނދުނު 9:00 އިން ފެށިގެން މެންދަމު 1:00 އާ ހަމައަށެވެ. 

މިހާތަނަށް އައިއިރު ބީއެމްއެލްއިން މި ޓެލެތޯނަށް ހާއްސަަކޮށްފައިވާ ދިވެހި ރުފިޔާ އެކައުންޓަށް އަށް ލައްކައަށްވުރެ ގިނަ ރުފިޔާ ޖަމާކޮށްފައިވާއިރު، ޑޮލަރު އެކައުންޓަށް 1،500 ޑޮަލަރުވަނީ ޖަމާކޮށްފައެވެ. 

މި ޓެލެތޯނުގައި ބީއެމްއެލްއިން ހުޅުވާފަައިވާ ދިވެހި ރުފިޔާ އެކައުންޓަށް އަދި ޑޮލަރު އެކައުންޓަށް ޓްރާންސްފާކޮށް ފައިސާ ޖަމާކުރެވޭއިރު، ބީއެމްއެލް މޯބައިލް އިންޓަނެޓް ބޭންކިން އެޕު މެދުވެރިކޮށް ކިއުއާރް ކޯޓު ބޭނުންކޮށްގެން ފައިސާ ޖަމާކުރެވޭނެއެވެ. 

އަދި މާލޭގެ ބައެއް ސަރަހައްދުތަކުގައި މި ޓެލެތޯނަށް ފައިސާ ހަދިޔާކުރުމަށް ޑޯނޭޝަން ބޮކްސްތައް ބަހައްޓާފައިވާއިރު އެ ފޮށިތަކަށް ފައިސާ ލައިގެންވެސް ފައިސާ ހަދިޔާކުރުމުގެ ފުރުސަތުވަނީ ހުޅުވާލާފަައެވެ. 

މި މަހުގެ 26 ވަނަ ދުވަހުގެ ސްރީލަންކާއަށް ކުރިމަތިވި ތޫފާނު ދީތުވާގައި އެ ގައުމަށް ގަދައަށް ވާރޭވެހި ފެންބޮޑުވުމުގެ ސަބަބުން 200 އެއްހައި މީހުން މަރުވެ، އެތައް ބަޔަކު ގެއްލި، 40،000 އަށްވުރެ ގިނަ މީހުން ގެދޮރު ދޫކޮށް ސަލާމަތް ސަރަހައްދުތަކަށް ބަދަލުވާންވަނީ މަޖުބޫރުވެފައެވެ. 

މި ކާރިސާއާ ގުޅިގެން ލަންކާއިންވަނީ ބައިނަލްއަގުވާމީ މުޖުތަމައާއި އަވައްޓެރި އެކުވެރި ގައުމުތަކުގެ އެހީތެރިކަމަށް އެދިފައެވެ.