ޖަޕާން ސަރުކާރުގެ ފަރާތުން 82 ފޫޓުގެ ޕެޓްރޯލް ވެސަލްއެއް މޮލްޑިވްސް ކަސްޓަމްސް ސަރވިސްއަށް ހަދިޔާކޮށްފިއެވެ.

މި އުޅަނދު ރަސްމީކޮށް ޙަވާލުކޮށްދެއްވީ، ބުރާސްފަތި ދުވަހު ކަސްޓަމްސް ބިލްޑިންގް ގައި ބޭއްވި ރަސްމިއްޔާތުގައެވެ.

ހަދިޔާ ހަވާލުކޮށްދެއްވީ ޖަޕާން އިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު އިޝިގާމީ ރުމީކޯއެވެ. ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވަނީ މި ރަސްމިއްޔާތު ޝަރަފުވެރިކޮށްދެއްވާ، ދިވެހި ސަރުކާރުގެ ފަރާތުން މި އުޅަނދާ ހަވާލުވެވަޑައިގެންފައެވެ.

މި އުޅަނދަކީ ޖަޕާން ސަރުކާރުގެ "އިކޮނޮމިކް ކޯޕަރޭޝަން ގްރާންޓް އެކްޓް" ގެ ދަށުން ރާއްޖޭގެ ބައިނަލްއަޤްވާމީ ބަނދަރުތައް ބެލެހެއްޓުން ހަރުދަނާ ކުރުމާއި ސަރވެއިލެންސްގެ މަސައްކަތަށް ޚާއްސަ ކުރި އުޅަނދެކެވެ.

އަދި މި އުޅަނދު އޮޕަރޭޓް ކުރުމުގެ މަސައްކަތްތައް ކުރިޔަށްގެންދިޔުމަށް ރާވާފައިވަނީ މޯލްޑިވްސް ނޭޝަނަލް ޑިފެންސް ފޯސްގެ ކޯސްޓްގާރޑާއި މޯލްޑިވްސް ކަސްޓަމްސް ސަރވިސް ގުޅިގެންނެވެ.

މި އުޅަނދު އޮޕަރޭޓް ކުރުމަށް ބޭނުންވާ ތަމްރީންތައް ޖަޕާނާއި ދިވެހިރާއްޖޭގައި ހިންގާފައިވާއިރު، މި ތަމްރީން ޕްރޮގްރާމްތަކުގައި ކަސްޓަމްސްގެ 23 އޮފިސަރުން ބައިވެރިވެފައިވެއެވެ.

މި ޙަފްލާގައި ބައެވެރިވެވަޑައިގަތް އިސްވެރިންގެ ތެރޭގައި ކޮމިޝަނަރ ޖެނެރަލް ފާތިމަތު ދިޔާނާ އާއި ކަސްޓަމްސްގެ އިސްވެރިން ހިމެނެއެވެ.

މި ރަސްމިއްޔާތު ނިމުމަށްފަހު މިނިސްޓަރ ޢަލީ އިޙްސާނާއި ޖަޕާނުގެ ސަފީރު މިސް އިޝިޤާމީ ރުމީކޯ އަދި ރަސްމިއްޔާތުގައި ބައިވެރިވެ ވަޑައިގެންނެވި އެންމެހާ ބޭފުޅުން، އުޅަނދު ބާއްވާފައިވާ މާލޭ ކޮމާޝަލް ހާބަރަށް ވަޑައިގެން އުޅަނދު ބައްލަވާލެއްވިއެވެ.