ސްރީލަންކާގެ ރައްޔިތުންނަށް ފަހުގެ ތާރީޚެއްގައި ކުރިމަތިވެފައިވާ އެންމެ ބޮޑު މޫސުމީ ކާރިސާގެ ސަބަބުން އެ ގައުމަށް ލިބެމުންދާ ގެއްލުންތަކުން ސަލާމަތް ކުރުމަށްޓަކައި އެންމެ ފުރަތަމަ އެހީގެ އަތެއް ދިއްކޮށްލީ ދިވެހިން ކަމަށް ސްރީލަންކާއިން ދިވެހިރާއްޖެއަށް ކަނޑައަޅާފައި ހުންނަވާ ސަފީރު، މުހައްމަދު ރިޒްވީ ހަސަން ވިދާޅުވެއްޖެއެވެ.

ސަފީރު މިފަދައިން ވިދާޅުވީ ޕަބްލިކް ސަރވިސް މީޑިއާ (ޕީއެސްއެމް) އިން އިސްނަގައިގެން މިއަދު ހެނދުނު 9 އަކުން ފެށިގެން ކުރިޔަށްގެންދާ "ސިލޯނާއެކު ދިވެހީން" ޓެލެތޯން ގައި ވާހަކަފުޅުދައްކަވަމުންނެވެ.

ސަފީރުގެ ވާހަކަފުޅުގައި، މިވަގުތު އިސްކަމެއް ދެނީ ރައްޔިތުން ސަލާމަތްކޮށް ޒަރޫރީ ބޭނުންތައް ފުއްދައިދިނުމަށްކަމަށް ވަނީ ވިދާޅުވެފައެވެ. އަދި ސައިކްލޯން ދިތުވާގެ ސަބަބުން ސްރީލަންކާއަށް ލިބެމުންދާ ގެއްލުންތައް ފާހަގަކޮށްފައިވެއެވެ.

އެގޮތުން ލަންކާގެ ގިނަ ބަޔަކަށް ބޯޑެތި ގެއްލުންތަކެއް ލިބެމުންދާކަމާއި ހާލުގައި ޖެހިފައިވާ ފަރާތްތައް ރައްކާތެރި ހިސާބުތަކަށް ބަދަލުކުރުމުގެ މަސައްކަތްތައް ކުރަމުންދާކަން ފާހަގަކުރައްވާފައިވެއެވެ.  

މުހައްމަދު ރިޒްވީ ހަސަން ވަނީ މި ފުރުސަތުގައި ދިވެހި ސަރުކާރުން އިސްނަންގަވައި، ދިވެހިރާއްޖެއިން ސްރީލަންކާއަށް ފޯރުކޮށްދެމުންދާ އެހީތެރިކަމާއި އެއްބާރުލުން ބަލައިގަނެފައެވެ. އަދި އެކަމަށް ޝުކުރު ވެސް އަދާކުރައްވާފައެވެ.

ސަފީރުގެ ވާހަކަފުޅުގައި ޒަމާނުއްސުރެން ސްރީލަންކާއާއި ރާއްޖޭގެ މެދުގައި އޮންނަ އަޚުވަންތަ ގުޅުމަށް އަލިއަޅުއްވާލާފައިވެއެވެ.

އެގޮތުން ދެ ގައުމުގެ މެދުގައި ހިއްސާވަނިވި ފަހުމްވުމެއް އޮންނަކަމާ، ރާއްޖެއާއި ލަންކާއަށް ކުރިމަތިވާ ދަތި އުނދަގޫ ހާލަތްތަކުގައި އެކަކު އަނެކަކަށް އަބަދުވެސް އެހީތެރިވާކަމަށް ސަފީރު ވިދާޅުވިއެވެ. އަދި ސަފީރު ވަނީ  އުނދަގޫ ދަނޑިވަޅުތަކުގައި ރާއްޖެއަކީ އެންމެ ފުރަތަމަ ލަންކާއެކު އެއްބައިވަންތަކަން ހާމަކުރާ ގައުމުކަމަށް ވެސް ވިދާޅުވެފައެވެ.

ސްރީލަންކާއާއި ދިވެހިރާއްޖޭގެ ގުޅުމަކީ ނިމުމެއްނެތި ދެމިއޮންނާނެ ގުޅުމެއްކަމާއި، މި ގުޅުން ދެމިއޮންނަނީ ދެ ގައުމުގެ މެދުގައިވާ އިޚްތިރާމެއްގެ ސަބަބުން ކަމަށް ނިންމާލަމުން ސަފީރު ވިދާޅުވިއެވެ.