ކުޅިވަރުގެ ދާއިރާ އިން އެއްބާރުލުން ދިނުމާ ގުޅޭ ގޮތުން މެމޮރަންޑަމް އޮފް އަންޑަސްޓޭންޑިންގ (އެމްއޯޔޫ) އެއްގައި ރާއްޖޭގެ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އާއި ތައިލެންޑުގެ ފަތުރުވެރިކަމާއި ކުޅިވަރާ ބެހޭ ވަޒީރު އަޓްތަކޯން ސްރީލަޓްތަޔަކޯން ސޮއިކުރައްވައިފިއެވެ.

ތައިލެންޑުގެ ކުޅިވަރު ވުޒާރާގައި މިދިޔަ ބުރާސްފަތި ދުވަހު ބޭއްވި ރަސްމިއްޔާތެއްގައި ސޮއިކޮށްފައިވާ އެމްއޯޔޫއަކީ ރާއްޖެއާއި ތައިލެންޑުގެ މެދުގައި ކުޅިވަރުގެ ދާއިރާގައި ގުޅުން ބަދަހިކުރުމާއި އެއްބާރުލުން ދިނުމުގެ އިތުރުން ގިނަ މަޤުސަދުތަކަކާއި އަމާޒުތަކެއްވާ ކަމަށް ކުޅިވަރު ވުޒާރާއިން ފާހަގަކޮށްފައިވެއެވެ.

އެގޮތުން ކުޅިވަރުގެ ދާއިރާގައި ދިވެހި ކުޅުންތެރިންނަށް ލިބެމުންދާ ކުރިއެރުންތައް ތަރައްގީކުރުމާއި ރާއްޖެއިން ބޭރުގައި ގައުމީ ޓީމުތައް ތަމްރީނުކުރުމުގެ އިތުރުން އެތުލީޓުންނަށް ސްކޮލާޝިޕް ހޯދައިދިނުމުގެ ފުރުސަތުތައް ފަހިވެގެންދާނެކަމަށް އެމްއޯޔޫގައި ފާހަގަކޮށްފައިވެއެވެ. ހަމައެއާއެކު ކުޅުންތެރިންގެ ފެސިލިޓީތައް މިހާރަށްވުރެން ހަރުދަނާކުރުން ވެސް ހިމެނެއެވެ.

މި ރަސްމިއްޔާތުގައި ދެ ގައުމުގެ ކުޅިވަރުގެ ދާއިރާގެ އިސްވެރިންތަކެއް ވަނީ ބައިވެރިވެވަޑައިގެންފައެވެ. އަދި ރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރު ފުވާދު ތައުފީޤު ވެސް ބައިވެރިވެޑައިގެންނެވިއެވެ.

ދެ ގައުމުގެ މެދު އޮންނަ ގުޅުމާއި ކުޅިވަރުގެ ދާއިރާގައި ބާއްވާ ގުޅުން ދިގު މުއްދަތަކަށް ދެމެހެއްޓުމަށް އުންމީދުކުރާކަން ދެ ގައުމުގެ ކުޅިވަރު ވަޒީރުން ވަނީ ފާހަގަކުރައްވައިފައެވެ.