އަންނަ އަހަރު ބާއްވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި، ވެރިކަންކުރާ ޕީއެންސީން ބާއްވާ ޕްރައިމަރީއަށް މާދަމާ ހުޅުވާލަން ނިންމައި، ޑިސެމްބަރު 27 ވަނަ ދުވަހު ވޯޓުލުން ކުރިއަށްގެންދަން ނިންމާފައިވާކަމަށް އެ ޕާޓީން ބުނެފިއެވެ. 

ކައުންސިލް އިންތިޚާބުގެ ޕްރައިމަރީއާ ގުޅޭ މަޢުލޫމާތު ޕީއެންސީން ހާމަކުރީ ޕާޓީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައެވެ. އެ ބައްދަލުވުމުގައި ޕީއެންސީން ލޯކަލް ކައުންސިލް އިންތިޚާބަށް ކަނޑައެޅި ކެމްޕޭން މެނޭޖަރު އަދި ޕީޖީ ލީޑަރު އިބްރާހީމް ފަލާޙު އާއި ޕާޓީގެ އިސް ބޭފުޅުން ބައިވެރިވަޑައިގެންނެވިއެވެ. 

ފަލާޙު ވިދާޅުވީ، ޕްރައިމަރީގައި ވާދަކުރަން، ޕީއެންސީގެ ވެބްސައިޓް މެދުވެރިކޮށް ހުށަހެޅޭނެ ކަމަށެވެ. ޕްރައިމަރީގައި ވާދަކުރަން ހުށަހަޅަންޖެހޭ މުއްދަތަކީ ޑިސެމްބަރު 1 އިން ޑިސެމްބަރު 15 ވަނަ ދުވަހުގެ އިރުއޮއްސި 6 ގެ ނިޔަލަށެވެ.

ޕާޓީއާ އަލަށް ގުޅޭ ފަރާތްތަކަށް ވެސް ޕީއެންސީގެ ޕްރައިމަރީގައި ވާދަކުރުމުގެ ފުރުޞަތު ހުޅުވާލާނެކަމަށް ޕާޓީން ވަނީ ބުނެފައެވެ. އެހެންނަމަވެސް، އެ މެންބަރުން އިލެކްޝަންސް ކޮމިޝަން މެދުވެރިކޮށް ޕާޓީއާ ގުޅުމުގެ ހުރިހާ ކަމެއް ފުރިހަމަކުރުމަށް ޕީއެންސީން ވަނީ އެދިފައެވެ. 

ނޫސްވެރިންގެ ބައްދަލުވުމުގައި ވާހަކަދައްކަވަމުން ފަލާޙު ވިދާޅުވީ ޕީއެންސީގެ ޕްރައިމަރީ ވެގެންދާނީ ރާއްޖޭގައި މިހާތަނަށް ބާއްވާ އެންމެ ބޮޑު ޕްރައިމަރީއަށް ކަމަށެވެ. އަދި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތުތަކާއެކު ޕީއެންސީގެ ފިކުރު ރަށްރަށުގައި ވަރަށް ބޮޑަށް ބަލައިގެންފައިވާ ކަމަށް އޭނާ ވިދާޅުވިއެވެ. 

ފަލާޙު އިތުރަށް ވިދާޅުވީ ލޯކަލް ކައުންސިލް އިންތިޚާބުގައި ޕީއެންސީއަށް ކާމިޔާބު ލިބުމަކީ ރައީސް ފައްޓަވާފައިވާ މަސައްކަތްޕުޅުތަކަށް ލިބޭނެ ފަސޭހައެއް ކަމަށެވެ. 

ނޫސްވެރިންގެ ބައްދަލުވުމުގައި ވާހަކަދައްކަވަމުން ދަތުރުފަތުރާއި މަދަނީ އުދުހުންތަކާ ބެހޭ ވުޒާރާގެ ވަޒީރު މުޙައްމަދު އަމީން ވިދާޅުވީ، ޕްރައިމަރީގައި 1400 އަށް ވުރެ ގިނަ ކެންޑިޑޭޓުން ބައިވެރިވާނެ ކަމަށެވެ. އެޕްލިކޭޝަން ޕްރޮސެސްކުރުން ކުރިއަށްގެންދާނީ ޕޯޓަލް މެދުވެރިކޮށް ކަމަށާއި، އެގޮތަށް އިންތިޒާމުކުރުމުން އިދާރީ ކަންކަން ފަސޭހަވެގެންދާނެކަމަށް ވަޒީރު އަމީން ވިދާޅުވިއެވެ. 

ކައުންސިލް އިންތިޚާބު ބާއްވަން އިލެކްޝަންސް ކޮމިޝަނުން ކަނޑައަޅާފައިވާ ތާރީޚަކީ 2026 ވަނަ އަހަރުގެ މާރިޗު 28 އެވެ. ކައުންސިލް އިންތިޚާބުގައި ވާދަކުރާ ކެންޑިޑޭޓުން އިލެކްޝަންސްއަށް އެދި ހުށަހަޅަން ހުޅުވާލާނީ ޖަނަވަރީ 17 ވަނަ ދުވަހުއެވެ.