އަވައްޓެރި ސްރީ ލަންކާއަށް ކުރިމަތިވެފައިވާ މޫސުމީ ކާރިސާގެ ސަބަބުން ދިމާވެފައިވާ އުނދަގޫ ޙާލަތުން އަރައިގަތުމުގައި، ދިވެހި ރައްޔިތުުންގެ ބައިވެރިވުން އިތުރުކުރުމުގެ ގޮތުން ޕަބްލިކް ސަރވިސް މީޑިއާ (ޕީއެސްއެމް) އިން އިސްނަގައިގެން ބާއްވަން ނިންމި "ސިލޯނާއެކު ދިވެހީން" ޓެލެތޯން މިއަދު 9 ޖެހިއިރު ފަށައިފިއެވެ. 

ޕީއެސްއެމްއިން ބުނީ "ސިލޯނާއެކު ދިވެހިން" ޓެލެތޯނުގައި 37 މީޑިއާއަކުން ބައިވެރިވާ ކަމަށެވެ. ޓެލެތޯން ކުރިއަށްގެންދާނީ މިއަދު ހެނދުނު 9 އިން ދަންވަރު 1 ޖެހުމާ ހަމައަށެވެ.

ޓެލެތޯން މިއަދު ހެނދުނު ފެށީ ޚާއްޞަ ރަސްމިއްޔާތަކާއެކު އެވެ. ރަސްމިއްޔާތުގައި ޕީއެސްއެމްގެ އިސްވެރިންނާއި ޓެލެތޯންގެ ބައެއް ޕްރެޒެންޓަރުން ބައިވެރިވެފައިވެއެވެ. 

ޕީއެސްއެމްއިން ވަނީ ޓެލެތޯންގައި ބައިވެރިވުމުގެ ފުރުޞަތު ހުރިހާ ދިވެހި ރައްޔިތުންނާއި، ޖަމިއްޔާތަކާއި ކްލަބްތައް އަދި އޮފީސްތަކަށް ވެސް ހުޅުވާލައިފައެވެ. 

ޓެލެތޯނުގައި ހިމެނޭ އެންމެ މުހިއްމު އެއްބަޔަކީ ލަންކާއަށް ފައިސާގެ އެހީތެރިކަން ފޯރުކޮށްދިނުމެވެ. އެގޮތުން، މާލެއާއި ހުޅުމާލެ އަދި ވިލިމާލޭގެ އެކި ސަރަޙައްދުތަކުގައި ފަންޑު ފޮށިތައް ބަހައްޓައި، އެ ފުރުޞަތު ވަނީ ހުޅުވާލާފައެވެ. ކިއުއާރު ކޯޑް ސްކޭންކޮށްގެން ފަސޭހައިން ފައިސާ ޖަމާކުރެވޭނެ އިންތިޒާމު އެ ސަރަޙައްދުތަކުގައި ވަނީ ހަމަޖައްސައިފައެވެ. އަދި، ނަގުދު ފައިސާ އާއި ޓްރާންސްފާގެ އިތުރުން ބޭންކު ޗެކު މެދުވެރިކޮށް ވެސް ޓެލެތޯނަށް ފައިސާ ހަދިޔާކުރެވޭނެއެވެ. 

"ސިލޯނާއެކު ދިވެހިން" ޓެލެތޯންގެ އޮޑިޓް ފާމްގެ ގޮތުގައި ހަމަޖައްސާފައިވަނީ ކްރޯ މޯލްޑިވްސް އެވެ. އޮޑިޓް ފާމަކާއެކު ޓެލެތޯން ކުރިއަށްގެންދިއުމުގެ ބޭނުމަކީ، މިނިވަން އޮޑިޓް ފާމެއްގެ ބެލުމުގެ ދަށުން ދެފުށް ފެންނަ ރައްޔިތުންގެ އިތުބާރާއެކު ޓެލެތޯން ކުރިއަށްގެންދިއުމެވެ. 

ލަންކާއަކީ އަބަދުވެސް ރާއްޖެއާ އެންމެ އަވައްޓެރި އެއް ޤައުމެވެ. އަދި، އެންމެ ގިނަ އަދަދަކަށް ދިވެހިން ދިރިއުޅޭ އެއް ޤައުމަކީ ވެސް ލަންކާއެވެ. 

ލަންކާއަށް ކުރިމަތިވި "ދީތުވާ" ތޫފާނުގެ އަސަރު ވަރަށް ބޮޑަށް ކޮށްފައިވާއިރު، މިހާތަށް 159 މީހުން މަރުވެ 833،000 މީހުންނަށް އަސަރުކޮށްފައިވާކަމަށް އެޤައުމުން އެންމެ ފަހުން އާއްމުކޮށްފައިވާ މަޢުލޫމާތުގައި ބުނެފައިވެއެވެ.