ތޫފާން 'ދީތުވާ' އާ އެކު ލަންކާގެ ޙާލަތު ގޯސްވެފައިވާއިރު، މިހާތަނަށް 159 މީހުން މަރުވެ މިލިއަނަކާ ގާތްކުރާ އަދަދަށް މީހުން ޙާލުގައި ޖެހިފައިވާކަމަށް އެޤައުމުން ހާމަކޮށްފިއެވެ. 

ފަހުގެ ތާރީޚެއްގައި ލަންކާއަށް ކުރިމަތިވި މޫސުމީ އެންމެ ބޮޑު ކާރިސާގެ އެންމެ ފަހުގެ މަޢުލޫމާތު އެޤައުމުގެ ޑިޒާސްޓަރ މެނޭޖްމަންޓް ސެންޓަރުން ހާމަކުރީ ރޭގައެވެ. އެގޮތުން އިއްޔެ އިރުއޮއްސި 6 ޖެހުމާ ހަމައަށް އެޤައުމުގެ 25 ސިޓީއަކުން، 833،985 މީހުންނަށް ތޫފާނުގެ އަސަރުކޮށްފައިވާކަމަށް ޑިޒާސްޓަރ މެނޭޖްމަންޓް ސެންޓަރުގެ ތަފާސްހިސާބުގައި ބުނެފައިވެއެވެ. ލަންކާގެ ޑިޒާސްޓަރ މެނޭޖްމަންޓް ސެންޓަރުން ބުނީ މިލިއަނެއްހާ މީހުންގެ ތެރެއިން ހާލުގައި ޖެހިފައިވާ އާއިލާތަކުގެ އަދަދު 234،503 އަށް އަރާކަމަށެވެ. 

މޫސުމީ ކާރިސާއާ ގުޅިގެން ލަންކާގައި ވަނީ 919 ރައްކާތެރިކަމުގެ ސެންޓަރުތައް ޤާއިމުކޮށްފައެވެ. އެ ސެންޓަރުތަކުގައި 34،198 އާއިލާއަށް ވަނީ ރައްކާތެރިކަން ފޯރުކޮށްދީފައެވެ. އެ އާއިލާތަކުން ޖުމްލަ 122،822 މީހުންނަށް ރައްކާތެރިކަން ފޯރުކޮށްދީފައިވެއެވެ. 

ތޫފާނުގެ ސަބަބުން ލަންކާއަށް ބޯކޮށް ވާރޭވެހުމާއެކު، ބައެއް ސަރަޙައްދުތަކުން ބިންގަނޑު ވަނީ ކަނޑައިގެންގޮސްފައެވެ. ތޫފާނުގެ އަސަރު ލަންކާއިން އެންމެ ބޮޑަށް ކުރި ސިޓީއަކީ ގެމްޕަހާއެވެ. ގެމްޕަހާގެ އިތުރުން ޕުތަލަމް އާއި ވެރިކަންކުރާ ކޮލަމްބޯގެ އިތުރުން މަނާރް އަދި ބެޓިކަލޯއާއިން ވެސް ގިނަ ބަޔަކު ވަނީ ޙާލުގައި ޖެހިފައެވެ. 

ޑިޒާސްޓަރ މެނޭޖްމަންޓް ސެންޓަރުން ބުނީ މި ސިޓީތަކުގެ އިތުރުން، ބަޑުލާ އާއި ކޭންޑީ އަދި ރަތުނަޕޫރުގެ އިތުރުން ޖަފްނާއަށް ވެސް ތޫފާނުގެ ސަބަބުން އަސަރުކޮށްފައިވާ ކަމަށެވެ. އަދި، ބައެއް ސިޓީތަކުގައި ހުރި ކޯރުތައް ކަނޑައިގެން ގޮސް ގެއްލުންވެދާނެކަމުގެ ބިރު އަދިވެސް އެބައޮތް ކަމަށް ޑިޒާސްޓަރ މެނޭޖްމަންޓް ސެންޓަރުން ބުނެފައިވެއެވެ. 

ލަންކާ ކުއްލި ޙާލަތުގައި އޮތްއިރު، އިދާރާތަކުން ވަނީ ކޮންމެހެން ކުރަންޖެހޭ ދަތުރެއް ނޫނީ ނުކުރަން އާއްމުންނަށް އިލްތިމާސްކޮށްފައެވެ.

އާބާދީގައި 23.2 މިލިއަން މީހުން ދިރިއުޅޭ ލަންކާގެ ސަލާމަތީ ކަންކަން ވަރުގަދަކޮށްފައިވާއިރު، އެޤައުމަށް އޮތް އެންމެ ބޮޑު ގޮންޖެހުމަކީ ތޫފާނުގެ ސަބަބުން ގެއްލުން ލިބިފައިވާ މިލިއަނެއްހާ މީހުންނަށް ކުއްލި އެހީތެރިކަން ފޯރުކޮށްދިނުމެވެ. އެހީތެރިކަމަށް އެދި ލަންކާއިން އިން ބައިނަލްއަޤްވާމީ އެހީއަށް ވެސް އެދިފައެވެ. އެގޮތުން އިންޑިއާއިން ވަނީ ކާބޯތަކެތި ހިފައިގެން އިއްޔެ ލަންކާއަށް އެތެރެވެ ޙާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދީފައެވެ. 

ލަންކާއަށް ކުރިމަތިވި ހިތާމަވެރި ހާދިސާއާ ގުޅިގެން ރާއްޖޭން ވެސް އަންނަނީ އެޤައުމަށް އެހީވަމުންނެވެ. އެގޮތުން، ދިވެހި ސަރުކާރުން ވަނީ 50،000 އެމެރިކާ ޑޮލަރާއި 25،000 މަސްދަޅު ކޭސް ލަންކާއަށް ހަދިޔާކުރަން ނިންމައިފައެވެ. އަދި، ލަންކާގެ މޫސުމީ ކާރިސާއާ ގުޅިގެން ޕަބްލިކް ސަރވިސް މީޑިއާ (ޕީއެސްއެމް) ގެ އިސްނެގުމާއެކު މިއަދު 9 އިން މެންދަމު 1 އާ ހަމައަށް ކުރިއަށްގެންދާ ޓެލެތޯން ވަނީ ފަށައިފައެވެ. ޓެލެތޯންގައި ވަނީ ލަންކާއަށް ފައިސާގެ އެހީތެރިކަން ފޯރުކޮށްދެވޭނެ ފުރުޞަތު ހުޅުވާލައިފައެވެ.