އެސްޓީއޯގެ މަޝްހޫރު ބްރޭންޑެއް ކަމުގައިވާ ހިޓާޗީގެ ޕަރޓްނަރޝިޕަށް 25 އަހަރު ފުރުމުގެ މުނާސަބާ ކުލަގަދަ ގޮތެއްގައި ފާހަގަ ކޮށްފިއެވެ.

މި މުނާސަބާ ފާހަގަ ކުރުމަށްޓަކައި 28 ނޮވެމްބަރު 2025 ވީ ހުކުރު ދުވަހުގެ ރޭ ބާސެލޯ ނަސަންދުރަގައި ވަނީ ވަރަށް ހާއްސަ ހަފްލާއެއް ބާއްވާފައެވެ.

ގަރުނަކަށް ވުރެ ގިނަ ދުވަސްވީ ހިޓާޗީ ކުންފުންޏަކީ ފެށުނީއްސުރެ ދުނިޔޭގެ ބާޒަރުގައި ނަން ވިދަމުން އަންނަ ހިޓާޗީ ކުންފުނީގެ އުފެއްދުންތައް ރާއްޖެއަށް ތަޢާރަފް ކުރެވުމާއިއެކު، ދިވެހީންގެ މެދުގައިވެސް މި ބްރޭންޑުގެ އުފެއްދުންތައްވަނީ ބޮޑު މަގުބޫލުކަމާއި އިތުބާރެއް ހޯދާ، އަދި މިއަދާއި ހަމައަށްވެސް އެ އިތުބާރު ދަމަހައްޓާފައި ކަމަށް އެސްޓީއޯއިން ބުނެފައިވެއެވެ. 

އެސްޓީއޯއިން ބުނީ ހިޓާޗީ އޭސީ ތަކާއި އައިސް އަލަމާރިތައް ފަދަ ޕްރޮޑަކްޓްތަކަކީ ގިނަބަޔެއްގެ ގެތަކުން މިހާރުވެސް ޖާގަ ހޯދަމުން އަންނަ އުފެއްދުންތަކެއް ކަމަށެވެ.

ހަފްލާ އަކީ އެސްޓީއޯ އާއި ހިޓާޗީ އާ ދެމެދު އުފެދިފައިވާ 25 އަހަރުވީ ގާތް ގުޅުމުގެ އަލިގަދަ ރަމްޒެއް ކަމަށް އެސްޓީއޯއިން ބުނެފައިވެއެވެ. 

ހަފްލާގެ ޝަރަފްވެރި މެހެމާނެއްގެ ގޮތުގައި ބައިވެރިވެ ވަޑައިގެންނެވީ ޖަޕާނުން ރާއްޖެއަށް ކަނަޑައަޅުއްވާފައި ހުންނަވާ ސަފީރު އިޝިގާމީ ރުމިކޯއެވެ. މީގެ އިތުރުން ހިޓާޗީ ކުންފުނީގެ މެނޭޖިން ޑިރެކްޓަރ އަދި ކުންފުނީގެ އިތުރު ބޭފުޅުން ވަނީ މި ޖަލްސާގައި ބައިވެރިވެ ވަޑައިގަންނަވާފައެވެ. ހަމަ އެއާއި އެކު، އެސްޓީއޯގެ ޗެއަރމަން އާމިރު މަންސޫރު، އެސްޓީއޯގެ ބޯޑު މެމްބަރުން، އެސްޓީއޯގެ މެނޭޖިންގް ޑިރެކްޓަރ ޝިމާދު އިބްރާހިމް އަދި މީގެ އިތުރުން އެސްޓީއޯގެ ކުރީގެ ބައެއް އިސް ބޭފުޅުންވެސް ވަނީ މި ހަފްލާގައި ބައިވެރިވެ ވަޑައިގަންނަވާފައެވެ.

މި ހަފްލާގައި ރާއްޖޭގައި ވިއްކާ ހިޓާޗީ ބްރޭންޑްގެ އުފެއްދުންތަކުގެ ތެރެއިން ހޮވާލެވިފައިވާ ޕްރޮޑަކްޓްތައް ވަނީ ޑިސްޕްލޭ ކުރެވިފައެވެ. މީގެ އިތުރުން، ހިޓާޗީއާއި އެސްޓީއޯގެ މި 25 އަހަރުވީ ޕަރޓްނަޝިޕްގައި އެންމެ ގިނައިން ހިޓާޗީ ޕްރޮޑަކްޓްތައް ބައްލަވައި ގެންނެވި 4 ކަސްޓަމަރެއް އަގުވަޒަން ކޮށް ވަނީ އެވޯޑް ދެވިފައެވެ.

އެންމެ ހާއްސަ ކަމެއްގެ ގޮތުން، މި ހަފްލާގައި ހިޓާޗީއިން އަލަށް ތަޢާރަފް ކުރެވުނު 'ހިޓާޗީ ނިއު އެއަރ' ރޭންޖްގެ ޕްރޮޑަކްޓްތައް ލޯންޗު ކުރެވިގެން ދިޔައެވެ.

އެސްޓީއޯއިން ބުނީ ހަފްލާއަކީ އެސްޓީއޯއަށާއި ހިޓާޗީ މެދުގައި އޮތް 25 އަހަރުވީ ގާތް ގުޅުން އިތުރަށް ހަރުދަނާ ކުރަން އެޅުނު މުހިއްމު ފިޔަވަޅެއް ކަމަށެވެ. އަދި، މި އިވެންޓުގެ އަމާޒަކީ މި ދެ ކުންފުނީގެ ދެމެދުގައި އޮތް ގުޅުމާއި އިތުބާރު އިތުރަށް ވަރުގަދަވެ، މުސްތަގުބަލުގައި މިފަދަ މުހިއްމު މަރުހަލާތަކައި ކާމިޔާބީތައް ފާހަގަކުރުންކަމަށް އެސްޓީއޯއިން ފާހަގަކޮށްފައިވެއެވެ.