ENGLISH

29 ނޮވެމްބަރު 2025

Advertisement

ލަންކާގައި ތިބި އެހީތެރިކަން ބޭނުންވާ ދިވެހިންނަށް ޒަރޫރީ ތަކެތި ފޯރުކޮށްދޭން ފަށައިފި

29 ނޮވެމްބަރު 2025

|

ޢަލީ ޝަހީމް

ލަންކާގައި ހުންނަ ދިވެހި ހައިކޮމިޝަނުން ބޭއްވި ބައްދަލުވުމެއްގެ ތެރެއިން. ހައިކޮމިޝަނުން އަންނަނީ ލަންކާގައި އުޅޭ ދިވެހީންގެ ޙާލަތު ގާތުން ބަލަމުން. ފޮޓޯ: ޕީއެސްއެމް

މި ފަހުގެ ތާރީޚެއްގައި އަވައްޓެރި ލަންކާއަށް ކުރިމަތިވި އެންމެ ބޮޑު މޫސުމީ ކާރިސާއާ ގުޅިގެން، ލަންކާގައި ދިރިއުޅޭ ދިވެހީންގެ ތެރެއިން އެހީތެރިކަން ބޭނުންވެގެން ރިޕޯޓްކުރާ އާއިލާތަކަށް ޒަރޫރީ ތަކެތި ފޯރުކޮށްދިނުމުގެ މަސައްކަތް ލަންކާގައި ހުންނަ ދިވެހި ހައިކޮމިޝަނުން ފަށައިފިއެވެ. 

ވިއްސާރަވެ، ބިންގަނޑު ކަނޑައިގެން ދިއުންފަދަ ހާދިސާތައް ކުރިމަތިވެ ލަންކާ ނުރައްކަލުގައި އޮތުމާއެކު އެޤައުމުން ވަނީ ރެޑް އެލާޓް ނެރެފައެވެ. 

ދިވެހި ހައިކޮމިޝަނުން، ދިވެހީންގެ ޙާލަތު ގާތުން އަންނަނީ މޮނިޓަރ ކުރަމުންނެވެ. ހައިކޮމިޝަނުން ބުނީ، އެހީތެރިކަމަށް އެދޭ ފަރާތްތަކަށް އެހީ ފޯރުކޮށްދިނުމުގެ މަސައްކަތް ފަށާފައިވާ ކަމަށެވެ. އެގޮތުން އެކި ސަރަޙައްދުތަކުގައި ތިބި ދިވެހިންނަށް ވިޔަފާރިކުރުމުގައި ގޮންޖެހުންތައް ހުރުމާއެކު، ކާބޯތަކެއްޗާއި ފެން ފޯރުކޮށްދިނުމުގެ މަސައްކަތް ހައިކޮމިޝަނުން އަންނަނީ ކުރަމުންނެވެ. 

ރިޕޯޓްކުރާ އާއިލާތަކަށް އެހީ ފޯރުކޮށްދިނުމުގެ އިތުރުން، ހައިކޮމިޝަނުން އަންނަނީ ލަންކާގައި އުޅޭ ދިވެހިންނަށް ގުޅައި ޙާލަތު އޮޅުންފިލުވަމުންނެވެ. އަދި، ލަންކާގެ ކޮލަމްބޯ އާއި އެހެނިހެން ސިޓީތަކުގައި ތިބި ދިވެހި ދަރިވަރުންގެ ޙާލަތު ވެސް ހައިކޮމިޝަނުން އަންނަނީ ބަލަމުންނެވެ. 

ލަންކާގެ މޫސުމީ ކާރިސާއާ ގުޅިގެން އެގައުމުގެ ޤައުމީ އެއާޕޯޓުގެ ބައެއް ފްލައިޓްތައް ވެސް ވަނީ ކެންސަލްވެފައެވެ. ހައިކޮމިޝަނުން ބުނީ އެއާޕޯޓުގައި ނުފުރި ތިބި ދިވެހިންގެ ޙާލަތު ވެސް ބަލަމުން އަންނަ ކަމަށެވެ. 

ލަންކާގައި ތިބި ދިވެހިންނަށް އެހީތެރިކަން ފޯރުކޮށްދިނުމުގެ އިތުރުން، ޙާލުގައި ޖެހިފައިވާ ލަންކާ ރައްޔިތުންނަށް ވެސް އެހީތެރިކަން ފޯރުކޮށްދިނުމަށް ތައްޔާރުވަމުން އަންނަ ކަމަށް ހައިކޮމިޝަނުން ބުނެފައިވެއެވެ. 

ދިވެހި އެމްބަސީން ރޭ އާއްމުކުރި ބަޔާނުގައި ވަނީ، ކޮންމެހެން ކުރަންޖެހޭ ދަތުރެއް ނޫނީ ނުކުރުމަށާއި، ހާދިސާތައް ހިނގާ ސަރަޙައްދުތަކަށް ނުދިއުމަށް އަދި ބޯކޮށް ވާރޭވެހޭ ވަގުތުތަކުގައި ބޭރަށް ނުނިކުތުމަށް ދިވެހިންގެ ކިބައިން އެދިފައިވެއެވެ. 

ލަންކާގެ ބައެއް ހިސާބުތަކުގެ ކޯރުތައް ފުރިގެން ބަންޑުންވާކަމަށް ލަފާކޮށްފައިވާތީ، ބިންތިރި ސަރަޙައްދުތަކާއި މޫދާ ކައިރި ސަރަޙައްދުތަކުގައި ދިރިއުޅޭ ދިވެހިން ރައްކާތެރި ސަރަޙައްދުތަކަށް ބަދަލުވާން ވެސް އެމްބަސީން ވަނީ އިލްތިމާސްކޮށްފައެވެ. 

ލަންކާގައި ތިބި ދިވެހީންގެ ތެރެއިން އެހީތެރިކަން ބޭނުންވާ ފަރާތްތަކުން، 0094768816666 ނަންބަރަށް ގުޅުމަށް ހައިކޮމިޝަނުން ވަނީ އެދިފައެވެ. އަދި، ލަންކާ ސަރުކާރުން ވަނީ އެހީތެރިކަމަށް އެދި 1912 ނަންބަރަށް ގުޅޭނެ ގޮތް ހަމަޖައްސައިފައެވެ.  

އެންމެ ފަހުގެ ރިޕޯޓުތައް ބުނާގޮތުން ލަންކާއަށް ދިމާވެފައިވާ މޫސުމީ ކާރިސާގައި 69 މީހުން މަރުވެ 34 މީހަކު ވަނީ ގެއްލިފައެވެ. 

ކިޔުންތެރިންގެ ހިޔާލު