ENGLISH

29 ނޮވެމްބަރު 2025

Advertisement

ދާއިރާގެ ރައްޔިތުންނަށް ފޮނުވި މެސެޖާ ގުޅިގެން އޮޅުމެއް އަރާފައިވާނަމަ މާފަށް އެދެން: އަސްމާ

29 ނޮވެމްބަރު 2025

|

މަރިޔަމް ލީމް

ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު. ދާއިރާގެ ރައްޔިތުންނަށް ފޮނުއްވި މެސެޖާ ގުޅިގެން ވަނީ މާފަށް އެދިވަޑައިގެންފަ. ފޮޓޯ: މަޖިލީހުގެ އިދާރާ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މާލެ ސަރަޙައްދުގައި ދިރިއުޅޭ ރައްޔިތުންނާ ބައްދަލުކުރެއްވުމަށް ބާއްވަވަމުން ގެންދަވާ ސިލްސިލާ ބައްދަލުވުންތަކުގެ ތެރެއިން، މާފަންނު ރައްޔިތުންނާއެކު ބާއްވަވާ ބައްދަލުވުމާ ގުޅޭގޮތުން ދާއިރާގެ ރައްޔިތުންނަށް ފޮނުއްވި މެސެޖާ ގުޅިގެން ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު މާފަށް އެދިވަޑައިގެންފިއެވެ.  

މާފަންނުގެ ރައްޔިތުންނާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައްދަލުކުރައްވާނީ ޑިސެމްބަރު 4 ވާ ބުރާސްފަތި ދުވަހުގެ ރޭ 8:30 ގަ އެވެ. އެ ބައްދަލުވުން ތާވަލުކޮށްފައި ވަނީ ތާޖުއްދީން ސްކޫލުގައި ބާއްވާ ގޮތަށެވެ. 

އެ ބައްދަލުވުމާ ގުޅޭގޮތުން އަސްމާ، ދާއިރާގެ ރައްޔިތުންނަށް ފޮނުއްވި މެސެޖެއް ކަމަށްބުނެ ބައެއް މީޑިއާތަކުން ވަނީ އެކި ގޮތްގޮތަށް ރިޕޯޓްކޮށްފައެވެ. އެގޮތުން އެ ބައްދަލުވުމުގައި ރައީސުލްޖުމްހޫރިއްޔާއާއާ ސުވާލެއް ކުރަން ނުވަތަ މެސެޖެއް ދޭން ބޭނުންވާ ނަމަ، އެންގުމަށް އެދިވަޑައިގެން، އަސްމާ މެސެޖު ކުރެއްވި ކަމަށް ބައެއް މީޑިއާތަކުން ރިޕޯޓްކުރިއެވެ. 

އަސްމާ ކުރެއްވި ކަމަށް ރިޕޯޓްކޮށްފައިވާ އެ މެސެޖާ ގުޅިގެން ފާޑުކިޔުން އަމާޒުވިއެވެ. 

އެކަން ހިނގިގޮތް ސާފުކޮށްދެއްވުމުގެ ގޮތުން އަސްމާ މިއަދު ވަނީ ބަޔާނެއް އާއްމުކުރައްވާފައެވެ. އެގޮތުން އަސްމާ ވިދާޅުވީ ރައީސުލްޖުމްހޫރިއްޔާގެ ބައްދަލުވުމާ ގުޅިގެން ނޮވެމްބަރު 26 ވަނަ ދުވަހު ފޮނުވި މެސެޖުގެ މާނަ އޮޅޭގޮތަށް ބައެއް ފަރާތްތަކުން މީސްމީޑިއާގައި މަޢުލޫމާތު ދައުރުކޮށްފައިވާ ކަމަށެވެ. 

އަސްމާ ވިދާޅުވީ، އެ މެސެޖަކީ ޖަލްސާގައި އެއްވެސް ސަބަބަކާހުރެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ސީދާ ސުވާލު ދެންނެވުމުގެ ފުރުޞަތު ލިބިވަޑައިނުގަންނަވާ ފަރާތްތަކުގެ ޚިޔާލާއި ކަންބޮޑުވުންތައް ވެސް ރައީސުލްޖުމްހޫރިއްޔާއާ ހަމައަށް ފޯރުކޮށްދިނުމުގެ މަޤްޞަދުގައި ފޮނުއްވި މެސެޖެއް ކަމަށެވެ. 

އެއީ ދާއިރާގެ ރައްޔިތުންގެ ޙައްޤުގައި އަދި އަސްމާގެ އަމިއްލަ ޙައިސިއްޔަތުން ފޮނުވި މެސެޖެއްކަމަށް ބަޔާނުގައި ވިދާޅުވެފައިވެއެވެ. 

"އެހެނީ، މާފަންނު މެދު ދާއިރާގެ ކޮންމެ ރައްޔިތަކަށް ވެސް އެބޭފުޅެއްގެ ޚިޔާލާއި ކަންބޮޑުވުމެއް ވެސް ފާޅުކުރެއްވޭނެ ފުރުޞަތު ލިބުމަކީ އަޅުގަނޑަށް ނުހަނު މުހިއްމު ކަމަކަށް ވާތީއެވެ. އަޅުގަނޑު ފޮނުވި މެސެޖާއި ގުޅިގެން އެއްވެސް ބޭފުޅަކަށް އޮޅުމެއް އަރާފައިވާނަމަ ނިހާޔަތަށް މާފަށް އެދެމެވެ." ބަޔާނުގައި އަސްމާ ވިދާޅުވެފައިވެއެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލެ ސަރަޙައްދުގެ ރައްޔިތުންނާ ބައްދަލުކުރެއްވުމަށް ފައްޓަވާފައިވާ ސިލްސިލާ ބައްދަލުކުރެއްވުންތަކުގެ ތެރެއިން މިހާތަނަށް ވަނީ ވިލިމާލެ އަދި މަންޗަންގޮޅި ރައްޔިތުންނާ ބައްދަލުކުރައްވައިފައެވެ. 

ކިޔުންތެރިންގެ ހިޔާލު