ބޭންކް އޮފް މޯލްޑިވްސްއިން ހިންގާ 3،000 ހައުސިން ޔުނިޓުގެ މަޝްރޫއުގައި ވިލިމާލެއައި ހުޅުމަލޭ ތިންވަނަ ފިޔަވަހީގައި ތަރައްގީކުރާ ހުރިހާ ހައުސިން ޔުނިޓަކީވެސް ތިން ކޮޓަރީގެ ޔުނިޓުތަކެއް ކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. 

އަތް ފޯރާ ފަށުގައި ބޯހިޔާވަހިކަން ފޯރުކޮށްދިނުމަށް މަރުކަޒީ ބޭންކު އެމްއެމްއޭއިން އެކުލަވައިލި އުސޫލުގެ ދަށުން ކުލި ދައްކައި ހަލާސްކުރުމުން މިލްކުވާ ގޮތަށް ކުއްޔަށް ދޫކުރަން ތަރައްގީކުރާ މި ފުލެޓުތަކާ ގުޅޭ ގޮތުން ރޭ މައްޗަންގޮޅި ރައްޔިތުންނަށް މައުލޫމާތު ދެއްވަމުން ރައީސް ވިދާޅުވީ މި ޔުނިޓުތައް ދޫކުރާނީ އެންމެ ބޮޑަށް ގެދޮރުވެރިކަން ބޭނުންވެފައިވާ މީހުންނަށް ބަލައިގެން ކަމަށެވެ. 

އިތުރަށް ރައީސް ވިދާޅުވި ގޮތުގައި މި މަޝްރޫއުގެ ދަށުން ކުލީގެ ގޮތުގައި އަގު ދައްކައި ހަލާސްކުރުމުން ތަން މިލްކުވާ ގޮތަށް ކުއްޔަަށް ދޫކުރާނީ ގިނަވެގެން 10،000 ރުފިޔާގެ ކުއްޔަކަށް ކަމަށެވެ. 

މި ފުލެޓުތައް ދޫކުރުމުގައި ބޮޑަށް އިސްކަންދޭނީ އެއްވެސް ގޮތަކަށް ގޯއްޗެއް ނުވަތަ ފުލެޓެއް ނެތް ފަރާތްތަކަށް ކަމުގައިވީ ނަމަވެސް ކުރިއަށް އޮތް ތަނުގައި ސަރުކާރުން ހިންގާ މަޝްރޫއުތަކުގައި ފުލެޓާއި ގޯތި ލިބިފައިވާ މީހުންނަށްވެސް ފުރުސަތު ހުޅުވައިލާނެ ކަމަށް ރައީސް އިޝާރާތްކުރެއްވިއެވެ. 

ފުލެޓުތަކާއި ގޯތީގެ ސިޔާސަތު އެކަށައެޅުމުގައި އެމަނިކުފާނު ވައުދުވެވަޑައިގެންނެވި ގޮތަށް ހުރިހާ ސިޔާސަތެއް ތަރުތީބުކުރައްވާފައިވާ ކަމަށެވެ. އެގޮތުން ކުރީ ސަރުކާރުގައި އިންސާފެއް ނެތި ފުލެޓު އަތުލި ފަރާތްތަކަށް ފުލެޓު ދެއްވުމަށް ވައުދުވެވަޑައިގެންނެވި ގޮތަށް އެމީހުންނަށްވެސް މި ސަރުކާރުން އަޅާ ފުލެޓުތަކުން ފުލެޓު ލިބޭނެ ކަމަށެވެ. 

ބީއެމްއެލްއިން ފަށާ ހައުސިން މަޝްރޫއުގެ އިތުރަށް އަންނަ އަހަރު 4،000 ހައުސިން ޔުނިޓުގެ މަޝްރޫއެއް އިންޑިޔާ ސަރުކާރުގެ މާލީ އެހީތެރިކަމާއެކު ކުރިއަށްގެންދިއުމަށް ސަރުކާރުން ރާވާފައިވާކަން ރައީސްވަނީ ކުރިންވެސް ހާމަކުރައްވާފައެވެ.