ބޭރު ފައިސާއާ ބެހޭ ބިލުގައި މީހުން ދިރިއުޅޭ ރަށްރަށުގައި ހިންގާ ގެސްޓުހައުސްތަކުން 25 ޑޮލަރު ބޭންކަށް ޖަމާކޮށް މާރުކުރަން ޖެހޭ ގޮތަށް ހިމަނާގައިވާ ނިންމުމަށް ކާނި ހޮޓެލްސް އެންޑް ޓުއާސްގެ ސިއީއޯ އަބްދުﷲ ނަޝީދު ތާއީދު ކުރައްވައިފި އެވެ.

ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަންގެ ރައީސްކަން ވެސް ކުރައްވާ އަބްދުﷲ އެކްސްގައި އެމްއެމްއޭ ޓެގްކުރައްވައި މިއަދު ކުރެއްވި ޕޯސްޓެއްގައި ވިދާޅުވީ މޯލްޑިވްސް މަނިޓަރީ އޮތޯރިޓޯ (އެމްއެމްއޭ) އިން އާންމުންގެ ހިޔާލަށް ހުޅުވާލާފައިވާ ބިލުގައި މީހުން ދިރިއުޅޭ ރަށްރަށުގައި ހިންގާ ގެސްޓުހައުސްތައް ކެޓަގަރީ ބީގައި ހިމަނާފައި ވުމަކީ ތާއީދުކުރެވޭ ކަމެއް ކަމަށެވެ.

"އެއީ ރަށްފުށުގެ ދެމެހެއްޓެނިވި ތަރައްގީ އަށް ފައިދާ ކުރާނެ ހަރުދަނާ ނިންމުމެއް،" ލޯކަލް ޓޫރިޒަމް އެންމެ ފުޅާކޮށް ހިންގަވާ އަބްދުﷲ ވިދާޅުވި އެވެ.

ބޭރު ފައިސާ އާ ބެހޭ ބިލުގައިވާ ގޮތުން ކެޓަގަރީ އޭގައި ހިމެނޭ ބޮޑެތި ރިސޯޓްތަކުން މަދުވެގެން 500 ޑޮލަރު ބޮލަކަށް ޖަމާކުރަން ޖެހޭނެ އެވެ. ރާއްޖޭގެ ޓޫރިޒަމް އިންޑަސްޓްރީގައި ހަރަކާތްތެރިވާ ބައެއް ކުންފުނިތަކުން ވަނީ އެކަމާމެދު ހިތްހަމަނުޖެހުން ފާޅުކޮށްފަ އެވެ.

އެމްއެމްއޭ އިން ވިދާޅުވެފައިވާ ގޮތުގައި ރާއްޖޭގައި ބޭރު ފައިސާގެ ހާލަތު ރަނގަޅުކޮށް، ޑޮލަރު މުއާމަލާތްތައް ހަމަމަގަށް އެޅުވުމަށް ބޭރު ފައިސާއާ ބެހޭ ހަރުދަނާ ގާނޫނެއް ހެދުމަކީ މި ވަގުތަށް ކޮންމެހެން ކުރަންޖެހޭ ކަމެކެވެ.