މާލެ އާއި ވިލިމާލެ ގުޅާލާ ބްރިޖާއި، އަދި ވިލިމާލެއަށް ސަރުކާރުން ގެންނަ ތަރައްޤީގެ މަޝްރޫޢުތަކާއެކު ވެސް ވިލިމާލޭގައި އިންޖީނުލީ އުޅަނދު ދުއްވުމަކީ ސަރުކާރުގެ ވިސްނުން ނޫން ކަމަށް އިމާރާތްކުރުމާއި، ގެދޮރުވެރިކަމާއި ބިނާރާ ބެހޭ ވުޒާރާގެ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ. 

ވަޒީރު ޑރ. މުއްޠަލިބް މިފަދައިން ވިދާޅުވީ ވިލިމާލޭ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިލިމާލޭ ރައްޔިތުންނާ ބައްދަލުކުރައްވަން ބޭއްވެވި ބައްދަލުވުމުގައި ވާހަކަދައްކަވަމުންނެވެ.  

ޑރ. މުއްޠަލިބް ވަނީ ވިލިމާލެއަށް އަންނަ ތަރައްޤީއާއެކު އެރަށުގައި އިންޖީނުލީ އުޅަނދު ދުއްވާނެކަމަށް ބައެއް ފަރާތްތަކުން ދައްކަމުން އަންނަ ވާހަކައިގެ ޙަޤީގަތް ހާމަކޮށްދެއްވާފައެވެ. 

ވިލިމާލޭގެ ތަރައްޤީއާ ގުޅޭގޮތުން ވަޒީރު ވިދާޅުވީ، 300 ހައުސިން ޔުނިޓް އެޅުމުގެ މަސައްކަތް ވިލިމާލޭގައި ކުރާނީ އެރަށުން ލިބެން އޮތް ހުރިހާ ޖާގައެއް ބޭނުންކޮށްގެން ކަމަށެވެ. މިއަހަރުގެ ތެރޭގައި ކޮންޓްރެކްޓަރު ހަމަޖައްސައި މަސައްކަތް ވަރަށް އަވަހަށް ފަށާނެކަމަށް ވަޒީރު ވިދާޅުވިއެވެ. ވިލިމާލެއަށް ސަރުކާރުން ގެނެސްދޭ ބޯހިޔާވަހިކަމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިލިމާލޭގެ ރައްޔިތުންނަށް ދެއްވާ ޚާއްޞަ ސަމާލުކަމުގެ ތެރެއިން ހިންގާ މަޝްރޫޢެއް ކަމަށް ވަޒީރު ވިދާޅުވިއެވެ. 

ޗައިނާގެ ހިލޭ އެހީގައި ވިލިމާލޭގައި 100 އެނދުގެ ހޮސްޕިޓަލެއް އެޅުމާއި ހުރިހާ މަގެއް ތަރައްޤީކުރުމުގެ މަސައްކަތުގެ މަރުޙަލާތައް ވެސް ސަރުކާރުން ފުރިހަމަކުރަމުން އަންނަކަމަށް ވަޒީރު ޑރ. މުއްޠަލިބް ވިދާޅުވިއެވެ. ވަޒީރު ވިދާޅުވީ ހޮސްޕިޓަލުގެ މަސައްކަތުގެ ފީސިބިލިޓީ ހަދައި، ކޮންޓްރެކްޓަރަކު ހަމަޖެއްސުމަށްފަހު 2026 ވަނަ އަހަރުގެ ތިން ވަނަ ކުއާޓަރުގައި ހޮސްޕިޓަލުގެ ޢަމަލީ މަސައްކަތް ފެށިގެންދާނެ ކަމަށެވެ. 

ވިލިމާލެ މަގުތައް ހަދަނީ މާލޭގެ މަގުތަކާއެކު ކަމަށާއި، އަންނަ އަހަރުގެ ކުރީކޮޅު އެކަމުގެ ޢަމަލީ މަސައްކަތް ފެށިގެންދާނެކަމަށް ވަޒީރު ވިދާޅުވިއެވެ. އަދި، މަގުތައް ހަދާއިރު ފެނާއި ނަރުދަމާ އަދި ކަރަންޓު އަޕްގްރޭޑްކުރުމުގެ މަސައްކަތް ކުރިއަށްދާނެކަމަށް ވަޒީރު ވިދާޅުވިއެވެ. ހުރިހާ މަސައްކަތެއް އެއްކޮށް ކުރަނީ ރައްޔިތުންނަށް ވީހާވެސް ފަސޭހަކޮށް ކުރިއަށްގެންދަން ކަމަށް ވަޒީރު ވިދާޅުވިއެވެ. 

ބްރިޖުގެ މަސައްކަތުގައި މޫދު އަޑީގައި ކުރަންޖެހޭ ހުރިހާ މަސައްކަތެއް ނިމިފައިވާކަމަށް ވަޒީރު ވިދާޅުވިއެވެ. ބްރިޖުގެ މަސައްކަތް ކުރަނީ މުޅިން އާ ކޮންޓްރެކްޓަރަކަށް ވެފައި، އެމަސައްކަތް އަވަސް ކުރުމަށް މަސައްކަތްކުރައްވަމުން ގެންދަވާކަން ވަޒީރު ފާހަގަކުރެއްވިއެވެ. 

"މި ތަރައްޤީ އަންނައިރުގަ އަޅުގަނޑު ފާހަގަކޮށްލަން ބޭނުންވޭ ކޮންމެހެން ނަގަންޖެހޭ ބިމެއް ނަގައިގެން ތަރައްޤީކުރުން ފިޔަވައި. މިސާލަކަށް ހައުސިން ޔުނިޓް އެޅުމަށްޓަކައި އަޅުގަނޑުމެން ގަސްތަކެއް ކަނޑަން ޖެހޭ. އެއީ ބިން ނެތީމަ. އެހެން ނޫނީޔާ ވީހާވެސް ބޮޑަކަށް ގަސްތައް ބަހައްޓައިގެން ރައްޔިތުންނާ މަޝްވަރާކޮށްގެން ގާއަޅަންޖެހޭ މަގުތަކުގައި ގާއަޅައިގެން، ތާރު އަޅަންޖެހޭ މަގުތަކުގަ ތާރު އަޅައިގެން އެގޮތަށް ތަރައްޤީކުރާނީ ރައްޔިތުންނާ މަޝްވަރާކޮށްގެން" ވަޒީރު ޑރ. މުއްޠަލިބް ވިދާޅުވިއެވެ.  

ތަރައްޤީގެ މަޝްރޫޢުތަކުގެ އަދާހަމަ ޙިއްޞާކުރެއްވުމަށްފަހު ވަޒީރު ޑރ. މުއްޠަލިބް ވަނީ ވިލިމާލޭގައި އިންޖީނުލީ އުޅަނދު ދުއްވުމަކީ ސަރުކާރުގެ ވިސްނުމެއް ނޫންކަމަށް ތަކުރާރުކޮށް ވިދާޅުވެފައެވެ. 

ވަޒީރު ވިދާޅުވީ ވިލިމާލޭގައި އިންޖީނުލީ އުޅަނދު ނުދުއްވޭ ގޮތް ހެދުމަށް، ޕާކިން ބިލްޑިން އެޅުމަށް މިދިޔަ ހަފްތާ ނިންމާފައިވާ ކަމަށެވެ. އަދި، އިންޑިއާގެ ލައިން އޮފް ކްރެޑިޑް (އެލްއޯސީ) ފެސިލިޓީގެ ތެރެއިން ޕާކިން ބިލްޑިން އެޅުމުގެ މަސައްކަތް ކުރައްވާނެކަމަށް ވަޒީރު ވިދާޅުވިއެވެ. 

ޕާކިން ބިލްޑިން އެޅުމާއެކު، މިހާރަށްވުރެ ފަސޭހަކޮށް އިންޖީނުލީ އުޅަނދު ޕާކުކުރުމުގެ ފުރުޞަތު ލިބިގެންދާނެކަމަށް ވަޒީރު ވިދާޅުވިއެވެ.