ސަރުކާރަށް ދެއަހަރު ވީއިރު ވަރަށް ބޮޑެތި ކުރިއެރުންތައް ރައީސުލްޖުމްހޫރިއްޔާ ޑރ. މުޙައްމަދު ހޯއްދަވާފައިވާކަމަށް، އެމްއެމްޓީވީއަށް ދެއްވި ޚާއްޞަ ބަސްދީގަތުމެއްގައި އިޤުތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ ވަޒީރު މުޙައްމަދު ސަޢީދު ވިދާޅުވެއްޖެއެވެ. 

ސަރުކާރަށް ދެއަހަރު ފުރުމާ ގުޅިގެން ދެއްވި ބަސްދީގަތުމުގައި ސަޢީދު އެންމެ ބޮޑަށް ފާހަގަކުރެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ޤައުމު ހިންގަން ލިބިވަޑައިގެންނެވިއިރު އޮތް އުނދަގޫ ޙާލަތެވެ. 

ވަޒީރު ވިދާޅުވީ، ސަރުކާރު ވެރިކަމާ ޙަވާލުވިއިރު، ރުފިޔާގެ އަގު އޮތީ ޑޮލަރުގެ ކުރިމަތީގައި ދުވަހަކުވެސް ނުވާވަރަށް ނިކަމެތިވެފައި ކަމަށެވެ. ސަރުކާރުގެ ކުންފުނިތައް ދަރާ ވިކިފައި އޮތްއިރު، ފައިސާގެ ކަންކަން އެމްޑީޕީގެ ވެރިކަމަށް މެނޭޖް ނުކުރެވުނު ކަމަށް ވަޒީރު ވިދާޅުވިއެވެ. އަދި، ހިންގަން ނިންމާފައިވާ މަޝްރޫޢުތައް މޮނިޓަރ ކުރެވޭނެ ގޮތްތަކެއް ވެސް ހަމަޖެހިފައި ނެތްކަމަށް ވަޒީރު ވިދާޅުވިއެވެ. 

ރާއްޖޭގެ އިޤްތިޞާދަށް އައި ދަށްވުމާއެކު، ބައިނަލްއަޤްވާމީ މާކެޓުގައި ރާއްޖޭގެ ރޭޓިން ދަށްވެ، އިތުބާރު ވެސް އޮތީ ގެއްލިފައި ކަމަށް ވަޒީރު މުޙައްމަދު ސަޢީދު ވިދާޅުވިއެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ޙަވާލުވެވަޑައިގަތުމާއެކު، ރާއްޖެ ބަނގުރޫޓު ވާނެކަމަށް ވާދަވެރިން ބުނަމުންދިޔަ ނަމަވެސް، ދެހަހަރު ފާއިތުވެދިޔައީ އެފަދަ ޙާލަތެއް މެދުވެރި ނުވެކަމަށް ވަޒީރު ފާހަގަކުރެއްވިއެވެ. 

ރާއްޖޭގެ ޙާލަތު ރަނގަޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރެޔާއި ދުވާލު ކުރެއްވި އެތައް މަސައްކަތްޕުޅުތަކެއްގެ ސަބަބުން ކަމަށް ވަޒީރު މުޙައްމަދު ސަޢީދު ވިދާޅުވިއެވެ.