އާސަންދައިގެ ދަށުން އައިޔޫއައި އަދި އައިވީއެފް ގެ ފަރުވާ ހޯދުމުގެ ފުރުސަތު ދެވަނަ ބުރުގައި 63 މީހަކަށް ލިބިއްޖެއެވެ. ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ހާމަކޮށްފައިވާ ގޮތުގައި އައިވީއެފް ގެ ފަރުވާއަށް ހުށަހެޅި 215 ދެމަފިރިންގެ ތެރެއިން ޝަރުތު ހަމަވެފައިވަނީ 63 ދެމަފިރިންނަށެވެ.

އެންސްޕާ އިން އިއްޔެ ވަނީ ޝަރުތު ހަމަވާ ފަރާތްތަކުގެ ލިސްޓް އާންމުކޮށްފައެވެ. މި ބުރުގައި ފަރުވާ ދިނުމަށް ހަމަޖެހިފައިވާ ފަރާތްތަކުން 30 ނޮވެމްބަރ 2024 ގެ ކުރިން ފަރުވާ ކުރިއަށްގެންދާނެ ގޮތުގެ ޕްލޭން ހިއްސާކުރުމާ ގުޅޭގޮތުން އެންސްޕާއިން އެފަރާތްތަކަށް މައުލޫމާތު ފޯރުކޮށްދޭނެކަމަށް ބުނެފައިވެއެވެ.

މި ލިސްޓަށް ޝަކުވާ ހުށަހެޅުމުގެ ފުރުސަތު މި މަހުގެ 10 ވަނަ ދުވަހާއި ހަމައަށް ހުޅުވާލައިފައިވެއެވެ. އޭގެފަހުން ޝަރުތު ހަމަވާ ފަރާތްތަކަށް ފަރުވާދިނުމުގެ ކަންކަން ކުރިއަށް ގެންދެވޭނެއެވެ. ޝަކުވާ ހުށަހަޅާ ފަރާތްތަކުގެ ޝަކުވާތައް ބަލައި މުރާޖަޢާ ކުރުމަށްފަހު 15 ނޮވެމްބަރުގައި މުރާޖަޢާ ލިސްޓެއް އާންމު ކުރާނެކަމަށް ވެސް ބުނެފައިވެއެވެ.