މޯލްޑިވްސް މީޑިއާ ކައުންސިލް (އެމްއެމްސީ) ގެ އެވޯޑް ނައިޓްގައި، އޯޑިއޯ އަދި ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު " ދީފައި ވަނީ އުސޫލުތަކާއި މަގުސަދުތަކާ ހިލާފަށް ކަމަށް އެވޯޑްތަކަށް އިންސާފު ކޮށްދިން ހަ ފަނޑިޔާރުން މިރޭ ވިދާޅުވެއްޖެ އެވެ.

ތަހުގީގީ ދާއިރާއިން ނޫސްވެރިކަމުގެ އިނާމު ލިބުނީ "އަދަދު" އޮންލައިންގެ "ސްކީލާން" ޑޮކިއުމެންޓްރީއަށެވެ. މިދިޔަ އަހަރުގެ ރިޔާސީ އިންތިޚާބުގެ ކެމްޕޭނާ ދިމާކޮށް ނެރުނު އެ ޑޮކިއުމެންޓްރީ ވަނީ ވަރަށް ގިނަ ބަޔަކު ދޮގުކޮށް އަދި ފާޑުކިޔުން އަމާޒުކޮށްފަ އެވެ. ރައީސް ޑރ. މުހައްމަދު މުއިއްޒުގެ ފަރާތްޕުޅުން ވެސް ވިދާޅުވެފައި ވަނީ އެއީ ހަގީގަތާ ހިލާފު ވާހަކަތަކެއް ހިމެނޭ ދޮގު ވީޑިއޯއެއް ކަމަށެވެ.

އެ ޑޮކިއުމެންޓްރީއާ ގުޅޭ ގޮތުން ފަނޑިޔާރުން މިރޭ ނެރުނު ބަޔާނުގައި ވަނީ ހަތް ކަމެއް ފާހަގަކޮށްފަ އެވެ. އޭގެ ތެރޭގައި އެ ޑޮކިއުމެންޓްރީއަކީ ދިވެހި މީޑިއާގެ އަޚުލާގީ މިންގަނޑުގައި ބަޔާންކުރާ އުސޫލުތަކަށް ބެލުމެއް ނެތި އާންމު ކޮށްފައިވާ ޑޮކިއުމެންޓްރީއެއްކަން އެމްއެމްސީ އަށް ފާހަގަވެގެން އެކަން އެ ގޮތަށް ނުކުރަން މިދިޔަ އަހަރުގެ ސެޕްޓެމްބަރު 28 ގައި ނޫސްބަޔާން ނެރެފައިވުމެވެ. އަދި އެ ޑޮކިއުމެންޓްރީ އެމްއެމްސީ އަށް ބަލައިގަނެ، ފަނޑިޔާރުންނާ ހަމައަށް ގެންދިޔައީ ވެސް ބަލަންވާ ވަރަށް ނުބަލައި ކަމަށް ފަނޑިޔާރުން ވަނީ ފާހަގަ ކުރައްވައިފަ އެވެ.

"ފަނޑިޔާރުން އުފެއްދި ސުވާލުތަކަށް އެމްއެމްސީން ޖަވާބުދާރީވެފައެއް ވެސް ނުވެ އެވެ. އެހެންވެ މި ޑޮކިއުމެންޓްރީ ކައުންސިލަށް ބަލައިގަތް ނިޔަތާ މެދު ވެސް ސުވާލު އުފެދެ އެވެ." ފަނޑިޔާރުންގެ ޕެނަލްގައި ހިމެނޭ ހަ ފަނޑިޔާރުން ސޮއިކުރައްވައި ނެރުއްވި ބަޔާނުގައި ވިދާޅުވެފައިވެ އެވެ. "ވީޑިއޯ ދާއިރާ އިން ތަހުގީގީ ނޫސްވެރިކަމުގެ އެވޯޑަށް އިންސާފު ކުރުމަށް ފަނޑިޔާރުންނަށް ދީފައިވާ ރުބްރިކްގައި ތަހުގީގީ ނަޒަރަކުން އުފެއްދުމަށް އިންސާފު ކުރެވޭނެ ގޮތް ވަރަށް ބޮޑަށް ވަނީ ހަނިކޮށްފަ އެވެ. ރުބްރިކްގައި 80 ޕަސެންޓް ފަރުމާ ކޮށްފައި އޮތީ ވީޑިއޯ އުފެއްދުމުގެ ޓެކްނިކަލް ކޮލިޓީސްތަކަށް މާކްސް ދޭން ޖެހޭ ގޮތަށެވެ. މިހެންވެ ތަހުގީގީ ނޫސްވެރިކަމުގެ ނަޒަރިއްޔާތަކުން މާކްސް ދެވޭނެ އެއްވެސް ގޮތެއް ނެތެވެ."

ފަނޑިޔާރުންގެ ޕެނަލްގައި ހަ ބޭފުޅުން ތިއްބަވާ އިރު މި ވީޑިއޯ ހުށަހަޅާފައި ވަނީ އެންމެ ތިން ފަނޑިޔާރުންނަށްކަން ފާހަގަކށޮށްފައިވެ އެވެ. އަދި އެ ތިން ބޭފުޅުން އުފެއްދެވި ސުވާލުތަކަށް ކައުންސިލުން ޖަވާބުދާރީވެފައެއް ވެސް ނުވެ އެވެ. ފަނޑިޔާރުންގެ ޕެނަލްގައި ހިމެނޭ އެހެން ބޭފުޅުންނަށް މި ވީޑިއޯ ހުށަހަޅާފައި އޮތްކަން ވެސް ހިއްސާކޮށްފައެއް ނުވެ އެވެ.