ENGLISH

04 އޭޕްރީލު 2025

Advertisement

ކަރަންސީ ސްވޮޕްގެ އަމަލީ މަސައްކަތް ފެށުމަށް އަންނަނީ ތައްޔާރުވަމުން: އެމްއެމްއޭ

27 ނޮވެމްބަރު 2024

|

އެމްއެމް ނިއުސް ޓީމް

މަރުކަޒީ ބޭންކް އެމްއެމްއޭގެ މައި އޮފީސް

ރިޒާވް ބޭންކް އޮފް އިންޑިޔާ (އާރްބީއައި) އާ އެކު ކަރަންސީ ސްވޮޕްގެ އަމަލީ މަސައްކަތް ފެށުމަށް ޓެކްނިކަލް ޓީމެއް އެކުލަވާލައި، މަސައްކަތް ކުރަމުން ގެންދާ ކަމަށް، މޯލްޑިވްސް މަނިތަރީ އޮތޯރިޓީ (އެމްއެމްއޭ) އިން މިއަދު ބުނެފި އެވެ.

އެމްއެއޭގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން، ޑެޕިޔުޓި ގަވަރުނަރު އަހުމަދު އިމާދު ވިދާޅުވީ މި މަހުގެ 21 ވަނަ ދުވަހު، އާރުބީއައިއާ އެކު ސޮއިކުރި އެމްއޯޔޫގެ ބޭނުމަކީ އެކަން ކުރިއަށް ގެންދާނެ ގޮތްތަކެއް ދެ ފަރާތުން އެއްބަސްވެ، އެކަމުގެ އަމަލީ މަސައްކަތް ފެށުން ކަމަށެވެ.

"މި އެމްއޯޔޫގެ ދަށުން ޓެކްނިކަލް ޓީމެއް އެކުލަވާލައްވާފައި، މިކަން ކުރިއަށް ގެންދާނީ ކިހިނެތްތޯ ބެލުމުގެ މަސައްކަތް ފެށިފައި މިހާރު މިވަނީ. އަޅުގަނޑުމެން އުއްމީދު ކުރަނީ ވީހާވެސް އަވަހަކަށް މި ސެޓެލްމަންޓް އެރޭންޖްމަންޓް ހަމަޖެހިގެން، ވިޔަފާރިތަކުން އިންޑިއާ އާއި ރާއްޖެ އާ ދެތެރޭގައި ކުރެވޭ މުއާމަލާތްތައް، އަޅުގަނޑުމެންގެ ކަރަންސީން (ރުފިޔާ އިން) ސެޓެލް ކުރެވޭނެ މެކޭނިޒަމެއް އެސްޓެބްލިޝް ވެގެން ދިއުން،" އިމާދު ވިދާޅުވި އެވެ.

ރާއްޖެ އާއި އިންޑިއާއާ ދެމެދު 400 މިލިއަން ޑޮލަރު އަދި 30 ބިލިއަން އިންޑިއަން ރުޕީސް (ގާތްގަނޑަކަށް 357 މިލިއަން ޑޮލަރު)ގެ ކަރަންސީ ސްވޮޕް އެއްބަސްވުމެއްގައި ދެ ގައުމުން ސޮއިކުރީ ރައީސް މުހައްމަދު މުއިއްޒު މި އަހަރުގެ އޮކްޓޫބަރު މަހު އިންޑިޔާ އަށް ކުރެވި ރަސްމީ ދަތުރުފުޅުގަ އެވެ. ރައީސް ވިދާޅުވެފައިވާ ގޮތުގައި ކަރަންސީ ސްވޮޕް ފެސިލިޓީގެ ސަބަބުން، ރާއްޖެއަށް މިވަގުތު ކުރިމަތިވެފައިވާ ބޭރު ފައިސާގެ ދަތިކަމަށް ވަރަށް ބޮޑު ލުޔެއް ލިބިގެންދާނެ އެވެ.

ޑެޕިޔުޓީ ގަވަރުނަރު އިތުރަށް ވިދާޅުވީ، ކަރަންސީ ސޮވޮޕްގެ ދަށުން ކުރެވޭ މުއާމަލާތްތައް ފަސޭހަކޮށް ޓްރާންސެކްޝަން ހަރަދު ކުޑަ ކުރުމަށްޓަކައި، އެމްއެމްއޭގެ ފަވަރަ ޕޭމަންޓް ސިސްޓަމް ކްރޮސްބޯޑާ ޓްރާންސެކްޝަންތަކުގައި ބޭނުން ކުރެވޭ ގޮތް ހެދުމަށް ވެސް ނިންމާފައިވާ ކަމަށެވެ.

އެމްއެމްއޭ އިން ބުނި ގޮތުގައި އާރުބީއައި އާ އެކު ހަދާ ލޯކަލް ކަރަންސީ ސެޓެލްމަންޓް އެރޭންޖުމަންޓް ސަބަބުން ދެގައުމުގެ މެދުގައި ވިޔަފާރި އާއި އިންވެސްޓްމަންޓްތައް އިތުރުވުމަށް މަގުފަހިވާނެ އެވެ.

ރާއްޖެ އާއި އިންޑިޔާ އާ ދެމެދުގެ މީގެ ކުރިން ވެސް ވަނީ ކަރަންސީ ސްވޮޕް އެއްބަސްވުންތައް ހަދައިފަ އެވެ.

ކިޔުންތެރިންގެ ހިޔާލު