އަމާޒަކީ ޓޫރިޒަމް ދާއިރާގެ 15 އެވޯޑް ރާއްޖެއަށް ހޯދުން ކަމަށް ފަތުރުވެރިކަމާ ބެހޭ ވަޒީރު އިބްރާހިމް ފައިޞަލް ވިދާޅުވެއްޖެއެވެ.

ވޯލްޑްސް ޓްރެވެލިންގ އެވޯޑްސްގައި ރާއްޖެ އަށް ލިބުނު ކާމިޔާބީ ފާހަގަކުރުމަށް ވެލާނާ އިންޓަރނޭޝަނަލް އެއަރޕޯޓުގައި ބޭއްވި ރަސްމިއްޔާތެއްގައި ފައިޞަލް ވިދާޅުވީ މިއީ މުޅި ސިނާއަތުގެ އެންމެން ގުޅިގެން ކުރި މަސައްކަތުގެ ފޮނި މޭވާ ކަމަށެވެ. 

މި އަހަރު ރާއްޖެއިން ވަނީ ވޯލްޑްސް ޓްރެވެލިންގެ ޖުމްލަ ނުވަ އެވޯޑެއް ހާސިލުކޮށްފައެވެ. އޭގެ ތެރޭގައި ވޯލްޑްސް ލީޑިން ޑެސްޓިނޭޝަންގެ އެވޯޑާއި ވޯލްޑްސް ލީޑިންގ ގްރީން ޑެސްޓިނޭޝަންގެ އެވޯޑް ހިމެނެއެވެ. މިއީ ރާއްޖެއިން ވޯލްޑްސް ލީޑިންގ ޑެސްޓިނޭޝަންގެ އެވޯޑް ހާސިލްކުރި ފަސް ވަނަ އަހަރެވެ. އަދި ވޯލްޑްސް ލީޑިންގ ގްރީން ޑެސްޓިނޭޝަން އެވޯޑު ލިބުނު ފުރަތަމަ ފަހަރެވެ.

"ކެޓަގަރީތަކުގައި ވާދަކޮށްގެން އިތުރަށް މަސައްކަތްކޮށްގެން ހޯދޭނެ އެވޯޑްތަކެއް އެބަހުރި. މި އަންނަ އަހަރު އަޅުގަނޑުމެން ޓާގެޓްކުރަނީ 15 ނުވަތަ 20 އެވޯޑް ހޯދުމަށް މަސައްކަތް ކުރަން. އެއީ އެމްއެމްޕީއާރުސީ އާއި އިންޑަސްޓްރީއާ އެކީގައި،" ވަޒީރު ފައިޞަލް ވިދާޅުވިއެވެ.

އަންނަ އަހަރަށް ވެސް އެމްއެމްޕީއާރުސީން މާކެޓިންގެ ގިނަ ހަރަކާތްތަކެއް ރާވާފައިވާ ކަމަށް އެ ކުންފުނީގެ މެނޭޖިން ޑިރެކްޓަރ އިބްރާހިމް ޝިއުރީ ވިދާޅުވިއެވެ.

"ކުރިއަށް އޮތް ތަނުގައި އަޅުގަނޑުމެން ރާވާފައިވާ ހަރަކާތްތަކަކީ މި އަހަރުގެ ހަރަކާތްތަކާ ކުޑަކޮށް ތަފާތު ހަރަކާތްތަކެއް. އަޅުގަނޑުމެން އާ މާކެޓްތަކެއްގެ ވާހަކަ އެބަ ދައްކަން. ޑައިވަސިފައިކުރާ ވާހަކަ އެބަ ދައްކަން. އިތުރު މާކެޓްތަކުގެ ގޮތުގައި ސްޕޯރޓްސް ޓޫރިޒަމް، ހެލްތު ޓޫރިޒަމް، ފިލްމް ޓޫރިޒަމް، އެޑިއުކޭޝަން ޓޫރިޒަމް މިހިރަ އޭރިއާތަކަކީ އެކްސްޕްލޯރ ކުރާނެ އޭރިއާތަކެއް،" ޝިއުރީ ވިދާޅުވިއެވެ.