ސަރުކާރުގެ ފަރާތުން، ގއ. ވިލިނގިލި ދާއިރާގެ ޕީއެންސީ މެންބަރު އާޒިމް އަބްދުލްއަޒީޒު މަޖިލީހަށް ހުށަހެޅުއްވި، ރާއްޖޭގެ އާބަން ސަރަހައްދުތަކެއް ކަނޑައެޅުމާއި ތަރައްގީކުރުމާ ގުޅޭ އުސޫލުތައް ހިމަނައި އާބަން ޑިވެލޮޕްމެންޓް ބިލު މަޖިލީހުން މިއަދު ފާސްކޮށްފި އެވެ.

ބިލް ފާސްކުރީ 70 މެންބަރުންގެ އަޤުލަބިއްޔަތުންނެވެ. ބިލާ ދެކޮޅަށް 11 މެންބަރުން ވޯޓު ދެއްވިއެވެ. 

މި ބިލުގައި ހިމެނެނީ ރާއްޖޭގައި އާބަން ސަރަހައްދުތައް ކަނޑައެޅުމާއި އެފަދަ ސަރަހައްދުތައް ތަރައްގީ ކުރުމަށް ހަދާފައިވާ ޕްލޭންތަކެވެ. މީގެ އިތުރުން އެ ޕްލޭނާ އެއްގޮތަށް ދެމެހެއްޓެނިވި ގޮތެއްގައި އާބަން ސަރަހައްދުތައް ތަރައްގީކޮށް ހިންގުމާ ގުޅޭ އުސޫލުތައް ވެސް ހިމަނާފައިވެ އެވެ.

މި ބިލު ދިރާސާ ކުރީ ގައުމީ ތަރައްގީ އާއި ތަރިކައިގެ ކޮމިޓީ އާއި ލާމަރުކަޒީ ކޮމިޓީ ގުޅިގެން އުފެއްދި ޖޮއިންޓް ކޮމިޓީއަކުންނެވެ.