ދަޢުލަތުގެ ދަރަނީގެ ބިލާއި ފިސްކަލް ބިލް މަޖިލީހުން މިއަދު ފާސްކޮށްފިއެވެ.

ދަޢުލަތުގެ ދަރަނީގެ ބިލް، ސަރުކާރުގެ ފަރާތުން މަޖިލީހަށް ހުށަހެޅުއްވީ ފުނަދޫ ދާއިރާގެ މެމްބަރު މުހައްމަދު މަމްދޫހުއެވެ. އަދި ދަޢުލަތުގެ ފިސްކަލް ބިލް ހުށަހެޅުއްވީ ސަރުކާރުގެ ފަރާތުން ތުލުސްދޫ ދާއިރާގެ މެމްބަރު އިބްރާހިމް ނަސީމެވެ.

ދެ ބިލު ވެސް ފާސްކޮށްފައިވަނީ 81 މެމްބަރުންގެ ތާއީދާ އެކުއެވެ.

މެމްބަރު ނަސީމް ވިދާޅުވި ގޮތުގައި ފިސްކަލް ބިލް ހުށަހެޅުއްވީ މިހާރު އޮތް ދައުލަތުގެ ޚަރަދަށް ޒިންމާވުމުގެ ޤާނޫނު ބަދަލުކޮށް އާ ޤާނޫނެއް އެކުލަވައިލައި ދައުލަތުގެ ފިސްކަލް ނިޒާމު ހަރުދަނާކުރުމަށެވެ. އަދި ދެފުށް ފެންނަ ގޮތަށް އެ ނިޒާމުގެ ހުރިހާ ކަމެއް އެކުލަވައިލުމަށެވެ. ކޮންމެ ރިޔާސީ ދައުރެއް ފެށޭތާ ހަ މަސްދުވަސް ހަމަވުމުގެ ކުރިން، އެ ރިޔާސީ ދައުރުގެ ފަސް އަހަރު ދުވަހުގެ މުއްދަތަށް އަމަލުކުރަންޖެހޭ ފިސްކަލް ޒިންމާގެ ޗާޓަރެއް، މި ޤާނޫނާ އެއްކޮތްވާ ގޮތުގެ މަތިން އެކުލަވާލަންވާނެ ކަމަށް މި ބިލުގައި ބަޔާންކޮށްފައިވެއެވެ.

ދައުލަތުގެ ދަރަންޏާ ބެހޭ އޮފީހެއް ހުޅުވުމަށް ދައުލަތުގެ ދަރަނީގެ ބިލުގައި ހިމަނާފައިވެއެވެ. ދައުލަތުގެ ދަރަންޏާ ބެހޭ ބިލު ގާނޫނަކަށްވެ އެ ގާނޫނަށް އަމަލު ކުރަން ފަށާތާ ހަމަސް ދުވަހުގެ ތެރޭގައި ޑެޓް މެނޭޖްމެންޓް އޮފީހެއް، ފިނޭންސް މިނިސްޓްރީގެ ދަށުން ހިންގާ އިދާރާއެއްގެ ގޮތުގައި ގާއިމުކުރަން ޖެހޭނެ ކަމަށް ވެސް އެ ބިލުގައިވެއެވެ. އަދި ފިނޭންސް މިނިސްޓްރީގައި މިހާރު ހިނގަމުންދާ ޑެޓް މެނޭޖްމެންޓް ޑިޕާޓްމެންޓުގެ އެންމެހާ ގާނޫނީ ޒިންމާތަކާއި މުވައްޒަފުންނާއި މުދަލާއި ވަސީލަތްތަކާއި އިލްތިޒާމުތަކާއި އިމްތިޔާޒުތައް އަލަށް އުފެދުނު އޮފީހަށް ބަދަލުވެގެން ދާނެކަމަށް ބިލުގައި ބުނެފައިވެއެވެ. ހަމަ މިއާއެކު މި އިދާރާގެ މައްސޫލިއްޔަތުތަކަކީ ޕްރޮފެޝަނަލްކަމާއެކު ނުވަތަ ސިޔާސީ ނުފޫޒުން އެއްކިބަވެގެން ކަމަށް އެ ބިލުގައިވެއެވެ. އެ އިދާރާގެ ކަންކަމާ ގުޅޭގޮތުން މަޖިލީހަށް ޖަވާބުދާރީ ވާން ޖެހޭނީ ފިނޭންސް މިނިސްޓަރެވެ.