ދައުލަތުގެ ބަޖެޓުން ހިންގޭ ވަރަށް ވުރެ ގިނަ މަޝްރޫއުތަކެއްގައި މިދިޔަ ސަރުކާރުން ސޮއިކޮށްފައިވާ ކަމަށް މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްްރަކްޗަރ، ޑރ. ޢަބްދުﷲ މުއްތަލިބް މިއަދު ވިދާޅުވެއްޖެ އެވެ. 

މިނިސްޓަރ މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލު ކުރުމުގެ ފުރުސަތުގައި މާވަށު ދާއިރާގެ މެމްބަރު އަހުމަދު ޝާކިރު ކުރެއްވި ސުވާލަށް ޖަވާބުދެއްވަމުންނެވެ.

މިހާރު ކޮންޓްރެކްޓްކުރެވިފައިވާ މަޝްރޫއުތަކުގެ ތެރެއިން ލ.ހިތަދޫ ކޯޒްވޭއާއި ލ. މާވަށު ބިންހިއްކުމާއި، ކޮންޓްރެކްޓް ނުކުރެވޭ ކުނަހަންދޫއަށް ޚާއްސަކޮށްފައިވާ ޕްރޮޖެކްޓަށް ބަޖެޓުގައި އެލޮކޭޝަން އެބަހުރިތޯ ކުރި ސުވާލަށް ޖަވާބު ދެއްވަމުން ވަޒީރު ވިދާޅުވީ މިދިޔަ ސަރުކާރުން ސޮއިކޮށްފައި ހުރި މަޝްރޫއުތަކުގެ ތެރެއިން ކޮންސްޓްރަކްޝަން މިނިސްޓަރީގައި ހުރި މަޝްރޫއުތަކުގެ އަގު އެކަނި ވެސް 39 ބިލިއަން ރުފިޔާއަށް އަރާ ކަމަށެވެ.

މަޝްރޫއުތައް ކުރިއަށް ގެންދާއިރު ދިވެހި ދައުލަތަށް ލިބޭ އާމްދާނީ އާއި ލޯނުތަކުން ލިބޭ ފައިސާއަށް ވެސް ބަލަންޖެހޭ ކަމަށާއި ބައެއް ރަަށްތަކުގެ މަޝްރޫއުތަކަށް ދެލައްކަ ރުފިޔާ ވެސް ޖަހައިފައިވާކަމަށް ފާހަގަކުރެއްވި އެވެ.