ސްޕެއިނަށް ކުރަމުންދާ ބޯ ވިއްސާރައިގައި އާދަޔާ ޚިލާފަށް ފެންބޮޑުވުމުގެ ސަބަބުން ރަތް އެލާޓް ނެރެފި އެވެ. 

މޫސުމާ ބެހޭ އިދާރާ އިން ބުނާ ގޮތުގައި ހަފްތާއެއްގެ ތެރޭގައި، އަހަރެއްގެ މައްޗަށް ސްޕޭނަށް ވާރޭ ވެހޭ މިންވަަރަށް ވިއްސާރަ ވެހިފައިވާ ކަމަށް ރިކޯޑުކުރެވިފައިވެ އެވެ. މީގެ އަސަރު އެންމެ ބޮޑަށް ކުރަމުންދަނީ ސްޕެއިންގެ އިރުމަތީ ސަރަހައްދުތަކަށާއި، ހުޅަނގު ދެކުނު ސަރަހައްދުތަކަށެވެ.

ކަމާބެހޭ ފަރާތްތަކުން މައުލޫމާތުދޭ ގޮތުގައި އިރުމަތީ ސަރަހައްދުތަކުން 158 މީހުން މަރުވެފައިވާއިރު ގެއްލިފައިވާ މީހުންގެ އަދަދު ސާފެއް ނުވެއެވެ. ގެއްލިފައިވާ މީހުން ހޯދުމުގެ މަސައްކަތް މިހާރު ވެސް ރެސްކިއު ޓީމްތަކުގެ އެހީގައި ކުރެވެމުންދާއިރު ހުޅަނގު ދެކުނު ސަރަހައްދުތަކަށް ރަތް އެލާޓް ނެރެ، ގެއިން ނުނިކުތުމަށް ވަނީ އިލްތިމާސްކޮށްފަ އެވެ.

ސްޕޭނަށް ކުރަމުން މިދާ ވިއްސާރައިގެ ސަބަބުން ޒަރޫރީ ބޭނުންތައް ފުއްދުމަށް ވެސް ދަތިތަކާ ކުރިމަތިވާކަމަށް އާންމުން ބުނެއެވެ. އެގޮތުން މަގުތައް ވަނީ ބްލޮކްވެ ވެހިކަލްތަކުން ތޮއްޖެހިފައެވެ. ބޭސް ހުސްވެ ކާބޯތަކެތި ލިބުމަށް ވެސް ދަތިތަކާ ކުރިމަތިލާން ޖެހިފައިވެ އެވެ. ބައެއް ސަރަހައްދުތަކުން ކަރަންޓު ކެނޑި ފޯނުގެ ޚިދުމަތް ވެސް ކެނޑިފައިވާ ކަމަށް މައުލޫމާތި ލިބެއެވެ. 

އެ ގައުމުގެ ސަރުކާރުންވަނީ 250 މިލިއަން ޔޫރޯގެ އެހީގެ ފަންޑެއް ޚާއްސަކޮށްފަ އެވެ.