މޯލްޑިވްސް 2.0 މަގުޗާޓުގެ މަޤްޞަދަކީ ދުނިޔޭގެ "ބެސްޓް ޕްރެކްޓިސަސް" ދިވެހި ރާއްޖޭގައި ތަންފީޒުކުރުމަށް މަގުފަހިކޮށްދިނުން ކަމުގައި ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެ އެވެ.

އ.ދ.ގެ އާންމު މަޖިލީހުގެ 80 ވަނަ ސެޝަންގެ ހަވާސާގައި ދިވެހި ރާއްޖެ އާއި އެސްޓޯނިއާ ގުޅިގެން "ޑިޖިޓަލް ޓްރާންސްފޯމޭޝަން ފޮރ ސަސްޓެއިނަބަލް ޑިވެލޮޕްމަންޓް" ގެ ނަމުގައި ބޭއްވި ސައިޑް އިވެންޓުގައި ޚާރިޖީ ވަޒީރު ވިދާޅުވީ ދިވެހިރާއްޖޭގައި އިންވެސްޓް ކުރުމަށް އެހެން ޤައުމުތަކަށާއި، ބައިނަލްއަޤްވާމީ ޖަމްޢިއްޔާ ޖަމާޢަތްތަކަށާއި، ޕްރައިވެޓް ސެކްޓަރަށް ދައުވަތު ދެއްވާ ކަމަށެވެ.

މިއަދު އޮތް ސެޝަންގައި ވަޒީރު ޑރ. ޚަލީލް ވަނީ ޑިޖިޓަލް ޓްރާންސްފޯމޭޝަންގެ ސަބަބުން ދެމެހެއްޓެނިވި ތަރައްޤީ ކުރިއެރުވުމަށް ކުރެވިދާނެ ކަންތައްތަކުގެ މައްޗަށް އަލިއަޅުއްވާލައްވާފައެވެ. 

އިވެންޓްގައި މަޢުޟޫއާއި ގުޅޭގުތުން ޕެނަލްޑިސްކަޝަންއެއް ކުރިއަށް ގެންގޮސްފައިވެއެވެ. މި ޕެނަލް ޑިސްކަޝަން މޮޑަރޭޓް ކޮށްދެއްވީ ފޮރިން މިނިސްޓްރީގެ ޖޮއިންޓް ސެކްރެޓަރީ މަރިޔަމް މިދްފާ ނައީމުއެވެ.

ޕެނަލްގައި ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) ގެ ހެޑް އޮފް ޑިޖިޓަލް ޕާޓްނަރޝިޕްސް އެންޑް އެންގޭޖްމަންޓް ޔޫ ޕިންގ ޗެން، ވޯލްޑް ބޭންކް ގްރޫޕްގެ ގްލޯބަލް ޑިރެކްޓަރ އެންޑް ޑިރެކްޓަރ އޮފް ސްޓްރެޓަގީ އެންޑް އޮޕަރޭޝަންސް، ޑިޖިޓަލް ވައިސް ޕްރެޒިޑަންސީ އައިޑާ ސްވަރެޔީ ރިޑިހޫ، އެސްޓޯނިއާގެ ޑެޕިއުޓީ މިނިސްޓަރ ފޮރ ގްލޯބަލް އެފެއާޒް  މީނާ-ލީނާ ލިންޑް އަދި ރައީސުލްޖުމްހޫރިއްޔާގެ އޮފީހުގެ ޑިޖިޓަލް ޓްރާންސްފޯރމޭޝަން ސްޓްރެޓެޖިސްޓް ސިޔާހް ޚަލީލް ބައިވެރިވަޑައިގެންވިއެވެ.

ޕެނަލް ޑިސްކަޝަންގައި ޑިޖިޓަލް މުސްތަޤްބަލެއް ޤާއިމުކުރުމަށް މަލްޓިލޭޓަރަލް ކޮލަބްރޭޝަންތަކުގެ މުހިންމު ކަމާއި ބެސްޓް ޕްރެކްޓިސްތަކާއި ދެމެހެއްޓެނިވި ގޮތެއްގައި ޑިޖިޓަލް މުސްތަގުބަލެއް ގާއިމުކުރެވޭނެ ގޮތްތަކާ ގުޅޭގޮތުން މަޝްވަރާ ކުރައްވާފައިވެއެވެ. 

މި ސައިޑް އިވެންޓަކީ އ.ދ.ގެ 79 ވަނަ ޢާންމު މަޖިލީހުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިޢުލާނު ކުރެއްވި ދިވެހިރާއްޖޭގެ ޤައުމީ ތަރައްޤީގެ ތަޞައްވުރާއި އެއްގޮތްވާ ގޮތުގެ މަތިން ވަކިން ޙާއްސަކޮށް 2040 ވަނަ އަހަރު ދިވެހިރާއްޖެއަކީ ފުރިހަމައަށް ތަރައްޤީވެފައިވާ ޤައުމަކަށް ވުމަށް ކުރަމުންދާ މަސައްކަތަށް ބާރުދިނުމުގެ ގޮތުން ބޭއްވުނު ސައިޑް އިވެންޓެކެވެ.

މި ސައިޑް އިވެންޓްގެ މައިގަނޑު މަޤްޞަދަކީ، ޑިޖިޓަލް ޓެކްނޮލޮޖީގެ އެހީގައި އިޤްތިޞާދު ކުރިއެރުވުމަށާއި، އުފެއްދުންތެރިކަން އިތުރުކުރުމަށާއި، 2030 ވަނަ އަހަރާ ހަމައަށް ދިވެހިރާއްޖޭގެ ޑިޖިޓަލް އިޤްތިޞާދު ޖީ.ޑީ.ޕީގެ 15 އިންސައްތަ ޙިއްޞާ ކުރުމަށް މަގުފަހިކުރުމެވެ.