މީގެކުރިން ޤައުމު ހިންގެވުމާ ޙަވާލުވެވަޑައިގަތް ވެރީންނާއި ސަރުކާރުތަކަށް އަތްލާން ނުކެރުނު މައްސަލަތައް މި ސަރުކާރުން ދަނީ ހައްލުކުރަމުން ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙްމަދު ނާޒިމް ވިދާޅުވެއްޖެއެވެ.

ނާޒިމް މިފަދައިން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މ. ދިއްގަރު ރައްޔިތުންނާ ބައްދަލުކުރެއްވުމަށް ބޭއްވެވި ރަސްމިއްޔާތުގައި ވާހަކަދައްކަވަމުންނެވެ.  

ނާޒިމް ވިދާޅުވީ، ރައީސުލްޖުމްހޫރިއްޔާ ގިނަ ރަށްތަކަށް ވަޑައިގަތުމަކީ އެމަނިކުފާނު ރައްޔިތުންގެ ގާތަށް ވަޑައިގެން ކަންކަން ނިންމެވުމަށް ހުންނެވި ޝައުގުވެރިކަން ދައްކުވައިދޭ ކަމެއް ކަމަށެވެ.

ރާއްޖޭގައި ހުރި މައްސަލަތައް ހައްލުކުރުމުގައި ސަރުކާރުން ކުރަމުން އަންނަ މަސައްކަތްތަކަށް އަލިއަޅުއްވާލައްވަމުން ނާޒިމް ވިދާޅުވީ، ހުރިހާ ކަމަކީ "އިންފްރާސްޓްރަކްޗަރ" ތަރައްގީކުރުން ނޫން ކަމަށެވެ. އެހެން ދާއިރާތަކުގައި ހުރި މައްސަލަތައް ފާހަގަކުރައްވައި ނާޒިމް ވިދާޅުވީ، މިހާރު ފެންނަނީ އެހެން އެއްވެސް ވެރިއަކަށް އަތްލާން ނުކުރެވުނު ކަންކަން ހައްލުކުރަމުންގެންދާތަން ކަމަށެވެ.

ނާޒިމް ވިދާޅުވީ، މިފަދަ ނިންމުންތަކާއެކު އިޖުތިމާއީ ގޮތުން މައްސަލަތަކަށް ހައްލު ލިބިގެންދާ ކަމަށެވެ. އަދި، ރައްޔިތުންނަށް މިހާރު އެމަންޒަރު ފެންނަކަމަށް މެންބަރު ވިދާޅުވިއެވެ. އެ ހުރިހާ ކަމަކަށް އިޝާރަތްކުރައްވައި ނާޒިމް ވިދާޅުވީ "ޤައުމުގެ މިސްރާބު ހުރީ ވަރަށް ރަނގަޅަށް" ކަމަށެވެ.

ރައްޔިތުންގެ މަޖިލީހުގެ ސުޕަރ މެޖޯރިޓީގައި ގިނަ މަސައްކަތްތަކެއް ކުރައްވަމުންގެންދަވާކަން ނާޒިމް ފާހަގަކުރެއްވިއެވެ. އަދި، މަޖިލީހުގެ އަގުލަބިއްޔަތު ލިބި 20 ވަނަ މަޖިލީހުން މިހާތަނަށް ނިންމާފައިވާ ބައެއް ނިންމުންތަކަކީ އުނދަގޫ ނިންމުންތަކެއް ކަމަށް ނާޒިމް ވިދާޅުވިއެވެ.

ނާޒިމް ވިދާޅުވީ ޑޮލަރާ ގުޅޭގޮތުންނާއި މީޑިއާ ބިލާ ގުޅޭގޮތުން މަޖިލީހުން ނިންމީ އުނދަގޫ ނިންމުންތަކެއް ކަމަށެވެ. އެހެންނަމަވެސް، އެ ނިންމުންތަކަކީ ޤައުމުގެ މުސްތަޤްބަލަށް ބަލާއިރު ރަނގަޅު ނިންމުންތަކަކަށްވެ، ކުރިމަގުގައި ރައްޔިތުންނަށް އެކަމުގެ ފައިދާ ލިބިގެންދާނެ ކަމަށް ވިދާޅުވިއެވެ.