"ލޫޓުވައިފި" އަދި "ދަވާލައިފި" ހިމެނޭ ޝިއާރުފަދަ ތަކެތި ދެމުން އެންމެ އައުލާކަން ބޮޑީ އެމްޑީޕީގެ ހަރުގެ ކުރިމަތީގައި ކަމަށް ރައްޔިތުންގެ މަޖިލީހުގެ ބާރަށު ދާއިރާގެ ޕީއެންސީ މެންބަރު އިބްރާހީމް ޝުޖާޢު (ޝުޖާ) ވިދާޅުވެއްޖެއެވެ. 

އެމްޑީޕީއަށް ރައްދުދެއްވީ ޝުޖާ މިއަދު "އެކްސް" ގައި ކުރެއްވި ޕޯސްޓެއްގައެވެ. "އެމްޑީޕީ ސަރުކާރުން ސޮވްރިން ޑިވެލޮޕްމަންޓް ފަންޑު ހުސްކުރި ގޮތް!" ނަމުގައި ރާއްޖޭގެ މީޑިއާއެއްގައި ތަފްސީލުކޮށް ގެނެސްދީފައިވާ މައުލޫމާތާ ޙަވާލާދެއްވައި ޝުޖާ ވިދާޅުވީ "މިއޮތީ ލޫޓުވާލިގޮތް ފެންނަން" ކަމަށެވެ. ޝުޖާ ވިދާޅުވީ ބެނާތައް ދެމިޔަސް މި ސަރުކާރުން ބެނާތައް ނުނަގާނެ ކަމަށެވެ. 

ޝުޖާ މިފަދައިން ވިދާޅުވިއިރު އެމްޑީޕީން އަންނަނީ މާލޭގެ މަގުތަކުގައި ސަރުކާރާ ދެކޮޅު ބެނާތައް ހަރުކުރަމުންނެވެ. އެ ބެނާތަކުގައި ސަރުކާރަށް ނިސްބަތްކޮށް އެކި ޝިޔާރުތައް ބޭނުންކޮށްފައިހުރެއެވެ. ޝުޖާ ވިދާޅުވީ އެމްޑީޕީގެ ވެރިކަމުގައި އިދިކޮޅަށް އެފަދަ ކަމެއް ކުރާނެ ހުއްދަ ވެސް ނުލިބުނު ކަމަށެވެ. 

ޝުޖާ ޙަވާލާދެއްވި ރިޕޯޓުގައި ބުނެފައިވަނީ ކުރީގެ ރައީސް އިބްރާހީމް މުޙައްމަދު ޞާލިހުގެ ރައީސްކަން 2023 ވަނަ އަހަރުގެ ނޮވެމްބަރު މަހު ނިމުނުއިރު، ކުރިން 500 މިލިއަން ޑޮލަރަށްވުރެ ގިނަ ފައިސާ ހުރި ސޮވްރިން ޑިވެލޮޕްމަންޓް ފަންޑް (އެސްޑީއެފް) ގައި ހުރީ އެންމެ 2.5 މިލިއަން ޑޮލަރު ކަމަށެވެ. އެއީ އެމްޑީޕީގެ ވެރިކަމުގައި އެންމެ ގެއްލުންބޮޑު އެއް މާލީ ތަރިކައިގެ ގޮތުގައި އެ ލިޔުމުގައި ސިފަކޮށްފައިވެއެވެ.