ކައިވެނި ރޫޅުމުން، ދަރިން ތިބިނަމަ ދޭން ޖެހޭ ހަރަދުގެ ގޮތުގައި މިހާރު ދެނީ މަދު އަދަދެއް ކަމަށާއި، އެ ކައިވެންޏަށް ލިބިފައިވާ ދަރިންގެ ޚަރަދަށް ބައްޕަ ދޭންޖެހޭ 2000 ރުފިޔާއިން ޚަރަދުތައް ފޫނުބެއް ދޭތީ މަޖިލީހުގެ ގަވާއިދު ކޮމިޓީ މެދުވެރިކޮށް ކަމާގުޅޭ އިދާރާތަކާ ބައްދަލުކޮށް ގަވާއިދު ބަދަލުކުރަން ގަލޮޅު އުތުރު ދާއިރާގެ މަޖިލިސް މެމްބަރު މުހައްމަދު އިބްރާހީމް އެދިވަޑައިގެންފިއެވެ.

މުހައްމަދު އިބްރާހިމް މަޖިލީހުގެ ރައީސް އަބްދުއް ރަހީމް އަބްދުﷲއަށް ފޮނުއްވި ސިޓީގައި ވިދާޅުވެފައި ވަނީ ޚިދުމަތާއި ތަކެތީގެ އަގު އިންތިހާއަށް އުފުލިފައިވާއިރު، މަހެއްގެ މައްޗަށް ކަނޑައެޅިފައިވާ 2000 ރުފިޔާއަކީ ދަރިންގެ ހުރިހާ ޚަރަދެއް ފޫބެއްދޭ ވަރަށް ވުރެ މާކުޑަ އަދަދެއް ކަމަށެވެ.

މީގެ އިތުރުން ކުއްޖާގެ އުމުރުން 18 އަހަރު ފުރެންދެން ކުއްޖާގެ ހަރަދަށާއި ކުއްޖާގެ ބެލުމުގެ ހަރަދަށް، އެއް ކުއްޖަކު ހުރިނަމަ މަހަކު 2،000ރ. އެއް ކުއްޖަކަށް ވުރެ ގިނަ ކުދިން ތިބިނަމަ، އިތުރުވާ ކޮންމެ ކުއްޖަކަށް މަހަކު 1،000ރ އަށްވުރެ މަދު ނޫން އަދަދެއް ދޭންވާނެ ކަމަށް ކަނޑައަޅާފައި ވާ ކަމަށެވެ. އަދި ހަރަދުގެ ގޮތުގައި ދޭ ފައިސާގެ އިތުރުން ކޮންމެ ދަރިއަކަށް އަހަރަކު ތިން ހެދުމާއި ކިޔަވައި ދިނުމުގެ ހަރަދުގެ ގޮތުގައި އަހަރަކު ދެ ޔުނީފޯމާއި، އެއް ބޫޓާއި ފޮތް ލިސްޓާއި ކިޔެވުމަށް ބޭނުންވާ އެހެނިހެން ތަކެތި ހޯދައި ދޭން ޖެހޭ ކަމަށް ވެސް އެ ސިޓީގައި ބުނެފައި ވެއެވެ. 

ގަވާއިދުގައި ބަޔާން ކޮށްފައިވާ މި އަދަދުގެ ސަބަބުން ކޯޓުގެ ދިގު މަރުހަލާ ކަނޑައްތު ކުރުމަށް ފަހު ވެސް ލިބެނީ ހަމަ މިއަދަދު ކަމުން ރޫޅިފައިވާ އައިލާތަކާއި އެކަނިވެރި މައިންނަށް މިކަން ބަރުދާސްތު ކުރަން އުނދަގޫ ކަމަކަށް ވެފައި ވާކަން އެ ސިޓީގައި ފާހަގަކޮށްފައި ވެއެވެ. 

މެބްބަރު މުހައްމަދު އިބްރާހިމް އެދިވަޑައިގަތީ މި ގަވާއިދަށް ގެންނަން ޖެހޭ ހެޔޮ ބަދަލުތައް ގެނެވޭނެ ގޮތް ހަދައިދިނުމަށެވެ.