ގދ. ތިނަދޫއަށް ސިޓީއެއްގެ ދަރަޖަ ދިނުން ބާތިލްކުރުމަށް ހައި ކޯޓަށް މައްސަލަ ހުށަހެޅި، އެންވަޔަރަމެންޓް މިނިސްޓްރީގެ ނައިބު ވަޒީރު މުޙައްމަދު ރާޣިބު (ފޮޓޯ) އެ މަގާމުން ވަކިކުރައްވައިފިއެވެ. 

ރައީސް ޑރ. މުޙައްމަދު މުޢިއްޒު އެ މަޤާމުން އޭނާ ވަކި ކުރެއްވިކަން އިއުލާނުކުރެއްވީ ސަރުކާރުގެ ތަރުޖަމާނު ހީނާ ވަލީދު މިއަދު "އެކްސް"ގައި ކުރެއްވި ޕޯސްޓެއްގައެވެ. ރާޣިބް އެ މަގާމުން ވަކިކުރެއްވީ ތިނަދޫއަށް ސިޓީއެއްގެ ދަރަޖަ ދިނުން އުވާލުމަށް ދައުލަތާ ދެކޮޅަށް ކޯޓަށް ދިއުމާ ގުޅިގެންކަމަށް ހީނާގެ އެޕޯސްޓްގައި ވިދާޅުވިއެވެ.

މީގެ ކުރިންވެސް ރާޣިބް ވަނީ ދަޢުލަތުގެ ނައިބް ވަޒީރެއްގެ ގޮތުގައި ހުންނަވައި ދަޢުލަތާ ދެކޮޅަށް ވަކާލާތުކުރެއްވުމުން، އެކަން އެހެން ނުކުރެވޭނެ ކަމަށް ހައިކޯޓުން އޭނާއަށް އަންގާފައެެވެ. ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކު ހަމަޖައްސަވާ ސިޔާސީ މަގާމެއްގައި ހުންނަވައިގެން، ދައުލަތާ ދެކޮޅަށް ވަކާލާތު ނުކުރެވޭނެ ކަމަށް މި މަހު ކުރީކޮޅު ހައި ކޯޓުން ނެރުނު އަމުރުގައިވެއެވެ.