ހިންމަފުށީގައި ހުންނަ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރުގައި ފުލުހުންގެ އޮޕަރޭޝަނެއް ފަށައިފި އެވެ.

މީޑިއާތަކާ ފުލުހުން ހިއްސާކުރި މެސެޖެއްގައި ބުނީ ޑްރަގު ރިހެބިލިޓޭޝަން ސެންޓަރުގައި ހަރަކާތްތެރިވަމުން ދަނީ ފުލުހުންގެ ޑްރަގް އެންފޯސްމަންޓުގެ ޓީމެއް ކަމަށެވެ. ނަމަވެސް މި އޮޕަރޭޝަންއާ ގުޅޭ އިތުރު މައުލޫމާތެއް ފުލުހުން ހާމައެއް ނުކުރެ އެވެ.

މައުލޫމަތު ލިބިފައިވާ ގޮތުގައި ހިންމަފުށީ ޑްރަގު ރިހެބިލިޓޭޝަން ސެންޓަރުގައި ޑްރަގު އެންފޯސްމެންޓުން ހަރަކާތްތެރި ވަނީ އެ ސެންޓަރަށް ފޯނެއް ވެއްދިކަމުގެ ތުހުމަތުގަ އެވެ.

ނޭޝަނަލް ޑްރަގު އެޖެންސީ (އެންޑީއޭ) ގެ ދަށުގައި ހުންނަ ހިންމަފުށީ ޑްރަގު ރިހެބިލިޓޭޝަން ސެންޓަރުގައި ދޭތެރެދޭތެއިން ފުލުހުންގެ އޮޕަރޭޝަންތައް ހިންގަ އެވެ.