ENGLISH
25 ނޮވެމްބަރު 2024
އެއްވެސް ފަރުދަކު ބާކީ ވިޔަ ނުދިނުމަކީ ސަރުކާރުގެ އަމާޒު: މިނިސްޓަރު
25 ނޮވެމްބަރު 2024
|
ފެމެލީ ޕްރޮޓެކްޝަން އޮތޯރިޓީން ބާއްވާ މަދަނީ ޖަމުޢިއްޔާތަކުގެ މަހާސިންތާ ހުޅުވުމުގެ ރަސްމިއްޔާތުގައި މިނިސްޓަރ ޑރ. ޢައިޝަތު ޝިހާމް ބައިވެރިވެވަޑައިގަންނަވަނީ
އެންމެ މަޤްބޫލު
ހުރިހާ ރައްޔިތުންނަށް ބޭނުންވާ ރައްކާތެރިކަމާއި ހިމާޔަތް ލިބިދޭ އަމާން މާހައުލެއް ޤާއިމުކޮށް، އެއްވެސް ފަރުދަކު ބާކީ ނުވާނެހެން އެންމެން ޝާމިލުވެ އުޅޭ އުފާވެރި އޯގާތެރި މުޖުތަމަޢެއް ތަރައްޤީ ކުރުމަކީ ސަރުކާރުގެ އަމާޒު ކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢައިޝަތު ޝިހާމް ވިދާޅުވެއްޖެ އެވެ.
އެ ކަމަނާ މިފަދައިން ވިދާޅުވީ ފެމެލީ ޕްރޮޓެކްޝަން އޮތޯރިޓީން ބާއްވާ މަދަނީ ޖަމުޢިއްޔާތަކުގެ މަހާސިންތާ ހުޅުވުމުގެ ރަސްމިއްޔާތުގައި ވާހަކަ ދައްކަމުންނެވެ.
އެގޮތުން އެ ވުޒާރާގެ ކަންކަން ބައްޓަން ކުރެވިގެން ދަނީ ޢާއިލީ ރައްކާތެރިކަމާއި، އިޖްތިމާޢީ ހަމަޖެހުން ޤާއިމުކުރުމާއެކު، އެކި ބާވަތުގެ ހާނިއްކަ އާއި އަނިޔާ ލިބިފައިވާ އަންހެނުންނާއި، ކުޑަކުދިންނާއި، އިސްރަށްވެހީންނާއި ނުކުޅެދުންތެރިކަން ހުންނަ ފަރާތްތަކަށް ބޭނުންވާ ހިމާޔަތާއި ރައްކާތެރިކަން ފޯރުކޮށް ދެވޭނެ ނިޒާމެއް ޤާއިމުކޮށް އެ އަމާޒަށް ވާޞިލުވުމަށް ކަމަށް މިނިސްޓަރު ފާހަގަ ކުރެއްވި އެވެ.
މީގެ އިތުރުން ގެވެށި އަނިޔާގެ މައްސަލަތައް މަދުކުރުމަށް ޓަކައި ސަރުކާރުން ތަފާތު މަސައްކަތްތައް ކުރެވެމުންދާ ކަމަށް ވެސް މިނިސްޓަރު ވިދާޅުވި އެވެ. ދުރާލާ އާއިލާތައް ބާރުވެެރި ކުރުވުމުގެ ގޮތުން މިނިސްޓްރީން އިސްނަގައިގެން ހިންގާ އިބަމަ ޕްރޮގްރާމާއި ރާއްޖޭގެ މީހުން ދިރިއުޅެމުންދާ ހުރިހާ ރަށެއްގައި ތިބި ރައްޔިތުން ގާތަށް ޒިޔާރަތްކޮށް އެމީހުންގެ ހާލުބަލުމުގެ ގޮތުން ކުރިއަށްގެންދާ "ހާލު ކިހިނެތް؟" ޕްރޮގްރާމް މިނިސްޓަރ ފާހަގަކުރެއްވި އެވެ.
ހަމައެއާއެކު ގެވެށި އަނިޔާގެ މައްސަލަތައް ރިޕޯޓްކުރުމަށް 24 ގަޑިއިރު ޚިދުމަތްދޭ ހެލްޕްލައިނެއް އުފައްދައި ޙިދުމަތް ފޯރުކޮށްދުމުންގެންދާކަމީ ސަރުކާރުން މިފަދަ ކަންކަމަށްދޭ ސަމާލުކަން އެނގިގެންދާ ކަމެއް ކަމަށް މިނިސްޓަރގެ ވާހަކައިގައި ފާހަގަކުރެއްވި އެވެ.
އެންމެން ގުޅިގެން މަސައްކަތްކޮށް، ވަކި ޖިންސަކަށް ވީތީ ކުރާ އަނިޔާ ހުއްޓުވައި އެކުވެރި އަދި އޯގާތެރި މުޖުތަމައެއް ބިނާކުރެވުމަކީ އަންނަން އޮތް ޖީލުތަކަށް ފަޚުރުވެރިވެވޭފަދަ ޤައުމެއްގެ ގޮތުގައިވެގެންދާނެ ކަމަށް މިނިސްޓަރ ވާހަކަފުޅު ނިންމާލަމުން ފާހަގަކުރެއްވި އެވެ.