އިންޑިއާ ސަރުކާރުން ރާއްޖެއަށް ކަނޑައަޅާ އާ ސަފީރަކަށް ގަންގަރަދަން ބަލަސުބްރަމަނިއަން (ފޮޓޯ) އައްޔަން ކުރުމަށް އިންޑިއާގެ އެކްސްޓާނަލް އެފެއާޒް މިނިސްޓްރީން ނިންމައިފިއެވެ.

ބަލަސުބްރަމާނިއަމަކީ މި ވަގުތު އިންޑިއާއިން ނައިޖީރިއާއަށް ކަނޑައަޅައިފައި ހުންނަވާ ސަފީރެވެ. ނަމަވެސް ދެން އޭނާ ހަވާލުވެ ވަޑައިގަންނަވާނީ ރާއްޖޭގައި ހުންނަވާ ސަފީރުކަމުގެ މަގާމާއެވެ.

އިންޑިއާގެ ޚާރިޖިއްޔާއިން ނެރުނު ބަޔާނެއްގައި ބުނީ އިންޑިއާއިން ރާއްޖެއަށް ކަނޑައަޅުއްވާ ސަފީރުކަމުގެ މަޤާމާއި ބަލަސުބްރަމާނިއަމް ވަރަށް އަވަހަށް ހަވާލުވެ ވަޑައިގަންނަވާނެ ކަމަށެވެ.

މިވަގުތު ނައިޖީރިއާގެ ހައި ކޮމިޝަނަރުކަން ކުރައްވަމުން ގެންދަވާ ބަލަސުބްރަމަނިއަންގެ ޑިޕްލޮމެޓިކް ކެރިއަރުގައި މޮސްކޯ، ވޮޝިންޓަން އަދި ބެންކޮކް ފަދަ މުހިންމު މިޝަންތަކުގައި މަސައްކަތް ކުރައްވާފައިވެއެވެ. އޭގެތެރޭގައި ޑެޕިއުޓީ ޗީފް އޮފް މިޝަންގެ މަގާމާއި އދ.ގެ އެސްކަޕްގައި އިންޑިއާގެ ޑެޕިއުޓީ ޕާމަނަންޓް ރެޕްރެޒެންޓެޓިވްގެ މަގާމު ހިމެނެއެވެ.