ސިޔާސީ ޕާޓީތަކުގެ ޤާނޫނުގެ ދަށުން މެންބަރުން ހަމަވާ ފަސް ސިޔާސީ ޕާޓީއަކަށް އިލެކްޝަންސް ކޮމިޝަނުން 28 މިލިއަން ރުފިޔާ ދޫކޮށްފިއެވެ. 

އިލެކްޝަންސް ކޮމިޝަނުން އިއްޔެ އާއްމުކުރި މަޢުލޫމާތުގައި ބުނެފައިވަނީ، އެ ފައިސާ ޕާޓީތަކަށް ދޫކުރަން ބޭންކުތަކަށް ފޮނުވާފައިވާ ކަމަށެވެ. 

ދައުލަތުގެ ބަޖެޓުން ފައިސާ ދެނީ 10،000 މެންބަރުން ހަމަވާ ޕާޓީތަކަށެވެ. 

ޤާނޫނުގެ 35 ވަނަ މާއްދާގައި ބަޔާންކޮށްފައިވާގޮތަށް ސިޔާސީ ޕާޓީތަކަށް ދޫކުރަނީ ދައުލަތުގެ އަހަރީ ބަޖެޓުގައި އެ އަހަރަކަށް ލަފާކުރާ އާމްދަނީގެ 0.1 އިންސައްތައެވެ. އިލެކްޝަންސް ކޮމިޝަނުން ބުނީ 2024 ޑިސެމްބަރު 31 ގެ ނިޔަލަށް ސިޔާސީ ޕާޓީތަކުގެ ދަފްތަރުގައި 10،000 މެންބަރުން ހަމަވާ ޕާޓީތަކަށް ފައިސާ ދޫކުރީ ޕާޓީގައި ތިބި މެންބަރުން ތިބި ނިސްބަތުން ކަމަށެވެ. އެގޮތުން ފައިސާ ދޫކުރީ އެވްރެޖްކޮށް ބޮލަކަށް 193.23 ރުފިޔާގެ މަގުން ކަމަށް އިލެކްޝަންސް ކޮމިޝަނުން ބުނެފައިވެއެވެ. 

ދައުލަތުގެ ބަޖެޓުން ފައިސާ ދޫކުރި ފަސް ޕާޓީއަކީ، ޕީޕަލްސް ނޭޝަނަލް ކޮންގްރެސް (ޕީއެންސީ) އާއި ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ އިތުރުން ޖުމްހޫރީ ޕާޓީ އަދި ޢަދާލަތު ޕާޓީ އާއި މޯލްޑިވްސް ޑިވެލޮޕްމެންޓް އެލަޔަންސް (އެމްޑީއޭ) އެވެ. 

އެންމެ ގިނައިން ފައިސާ ލިބުނީ އެންމެ މެންބަރުން ގިނަ ޕީއެންސީއަށެވެ. އެގޮތުން ޕީއެންސީއަށް ވަނީ 13 މިލިއަން ރުފިޔާ ލިބިފައެވެ.